Кіраўнік Менскага аблвыканкама адважыўся на спрэчку з Лукашэнкам :: Хартыя'97 :: Навiны

Сэлектарнай нарада ў пытаньнях жніва, якую правеў 5 жніўня Аляксандар Лукашэнка, была азначана нечаканасьцю. Як зазвычай, многія высокапастаўленыя чыноўнікі патрапілі пад крытыку Лукашэнкі, які, напрыклад, параўнаў увесь Савет Міністраў з “разваленым калгасам, што трэба прыватызаваць і перадаць прыватніку”. Аднак толькі Мікалай Дамашкевіч, кіраўнік вэртыкалі Менскай вобласьці, адважыўся на жорсткую спрэчку з Лукашэнкам. Радыё Свабода падае стэнаграмму размовы Лукашэнкі з Дамашкевічам.

Калі Лукашэнка павысіў голас на Дамашкевіча за ягонае жаданьне набыць імпартныя камбайны, той рэзка адказаў: “Я – сумленны чалавек, і няма чаго мяне на ўсю краіну бэсьціць”. Пасьля гэтага пачалася сапраўдная сварка паміж Дамашкевічам і Лукашэнкам.

(Дамашкевіч: ) “Таму што хлеб сёньня вырас добры, а сабраць – б’юць па руках і нагах. Ня толькі Дамашкевічу”.

(Лукашэнка: ) “Заўтра прыйдзеце да мяне й дакладзеце, хто вас стукнуў па руках і нагах”.

(Дамашкевіч: ) “Добра”.

(Лукашэнка: ) “Заўтра дакладзеце. А не дакладзеце – я вас здыму з пасады”.

(Дамашкевіч: ) “Добра”.

(Лукашэнка: ) “Мне надакучылі вашыя папрокі агулам. Вы нідзе не вінаваты. Перадача гаспадарак – вы не вінаваты…”

(Дамашкевіч: ) “Значыць, таму што…”

(Лукашэнка: ) “Вы слухайце, што я вам кажу. Калі рогі вырасьлі, то мы іх хутка вам саб’ем… Зчапіўся зь нейкім там кіраўніком. Адны дакладаюць адно, іншыя – другое. Нейкае пакрывальніцтва ідзе старшыняў райвыканкамаў, якія бліжэй. Падзяліў вобласьць: адныя лепшыя, другія – горшыя. Каб гэтага, Мікалай Фёдаравіч, не было”.

(Дамашкевіч: ) “Гэтага няма. Гэта папросту плёткі”.

Аляксандар Лукашэнка паабяцаў Дамашкевічу, што заўтра ж паедзе інспэктаваць гаспадаркі Менскай вобласьці.
Минск, Белоруссия