Старшыня акруговай выбарчай камісіі агітуе за прадстаўніка ўлады :: Хартыя'97 :: Навiны

Старшыня акруговай выбарчай камісіі Шчучынскай выбарчай акругі прыняў удзел у агітацыйным сходзе, падчас якога памочнік прэзідэнта па Гродзенскай вобласці Вінцэнты Казяк, быў вылучаны кандыдатам у дэпутаты “палаты прадстаўнікоў” па названай акрузе. Пра гэта ў ананімным артыкуле пад назвай “Пры аднагалоснай падтрымцы” піша газета Шчучынскага райвыканкама “Дзянніца”.

“Пасля працоўнай змены ў актавай зале ААТ "Шчучынскі масласырзавод" сабраліся амаль усе яго работнікі. Разглядаліся два пытанні: аб выніках работы калектыву за сем месяцаў гэтага года і вылучэнне кандыдата ў дэпутаты Палаты прадстаўнікоў Нацыянальнага сходу Рэспублікі Беларусь трэцяга склікання”, - пачынаецца артыкул у газеце. (захаваны правапіс арыгінала).

З артыкула вынікае, што ўдзел у сходзе працоўнага калектыву браў старшыня Іван Сакалоўскі, які “расказаў аб той рабоце, якая праводзіцца ў раёне ў сувязі з прадстаячымі выбарамі.”

Вылучыць кандыдатам у дэпутаты Вінцэнты Казяка, памочніка Прэзідэнта Рэспублікі Беларусь, галоўнага інспектара па Гродзенскай вобласці прапанавала галоўны інжынер ААТ "Шчучынскі масласырзавод". Сам Вінцэнты Казяк таксама выступіў на сходзе і “цёпла падзякаваў за аказанае давер`е” завадчанам. Сход аднагалосна прыняў рашэнне падтрымаць кандыдатуру Вінцэнты Казяка для вылучэння яго кандыдатам у дэпутаты “палаты прадстаўнікоў” “нацыянальнага сходу” Рэспублікі Беларусь па Шчучынскай выбарчай акрузе №62.

Падобныя сходы, піша газета “Дзянніца”, прайшлі таксама ў СВК “Дэмбрава”, “Жалудоцкі”, ДП “Шчучынская МПМК-166”.

Напрыклад, у вёсцы Доцішкі Воранаўскага раёна ў сельскім Доме культуры адбыўся сход калгаснікаў, на якім з агітацыйнай праграмай выступіў тойжа Вінцэнт Казяк. На сходзе прысутнічалі старшыня Воранаўскага райвыканкама Васіль Ігнатавіч Сцяпура і старшыня сельскагаспадарачага вытворчага кааператыва (СВК) “Доцішкі” Генадзь Казлоўскі. Падчас схода Генадзь Казлоўскі катэгарычна забараніў усім жыхарам сельскага савета ставіць свае подпісы за вылучэнне кандыдатам у дэпутаты Аляксандра Мілінкевіча. Белоруссия