Віцэ-прэзыдэнтка ПА АБСЭ: «Я супраць гэтага рэфэрэндуму» :: Хартыя'97 :: Навiны

Дзейны старшыня АБСЭ, міністар замежных справаў Баўгарыі Саламон Пасі прызначыў чатырох парлямэнтароў адмысловымі каардынатарамі, якія ачоляць назіральныя місіі на выбарах у Беларусі, Казахстане, Украіне ды Злучаных Штатах. Каардынатарам па Беларусі стала віцэ-прэзыдэнтка ПА АБСЭ Тунэ Тынгсгорд, дэпутатка рыксдагу Швэцыі. Адрозна ад брытанкі Одры Главэр, якая будзе кіраваць місіяй назіральнікаў ад Бюро дэмакратычных інстытутаў і правоў чалавека АБСЭ, швэдка Тунэ Тынгсгорд будзе ачольваць групу кароткачасовых назіральнікаў ад усяе АБСЭ.

“Парлямэнтары, я мяркую, прыбудуць за два-тры дні да выбараў. Гэта, як чакаецца, будзе даволі вялікая група, таму што людзі зацікаўленыя ў Беларусі. І мінулы раз, калі я брала ўдзел у назіраньні ў Беларусі, мы былі вялікай групай”, -- паведаміла віцэ-прэзідэнтка ПА АБСЭ Радыё Свабода.

Спадарыня Тынгсгорд удакладніла, што яна была назіральніцай на мінулых парлямэнцкіх выбарах 2000 году. Я папрасіў яе пракамэнтаваць таксама рашэньне Аляксандра Лукашэнкі правесьці рэфэрэндум.

“Я ня зьдзіўленая. Я ў значнай ступені супраць гэтага. І я думаю, што гэта зроблена за такі кароткі тэрмін! Шмат якія палітычныя партыі ў Швэцыі былі занятыя рознымі праектамі з палітычнымі партыямі ў Беларусі якраз таму, што мы заклапочаныя тым, каб Беларусь рухалася ў больш дэмакратычным кірунку”, -- сказала Тунэ Тынгсгорд.
Минск, Белоруссия