Беларусы замежжа яднаюцца :: Хартыя'97 :: Навiны

Адзін з каардынатараў руху “Зубр” Уладзімір Кобец узяў удзел у Зьезде "апошняй хвалі" палітычнай эміграцыі, які адбыўся 4-5 верасня ў Антвэрпэне. У Зьездзе ўзялі ўдзел 60 удзельнікаў – прадстаўнікі дыяспараў Бэльгіі, Галандыі, Вялікае Брытаніі, Нямеччыны, Польшчы, Чэхіі, Фінляндыі, Нарвегіі, Аўстрыі, Швэцыі, а таксама госці з Беларусі. На пытанні прэс-службы руху “Зубр” аб значэнні і выніках з’езду адказвае Уладзімір Кобец:

-- Аб чым кажа запрашэнне прадстаўніка моладзевага руху “Зубр” на Зьезд палітычнай эміграцыі?

-- Запрашэнне руху “Зубр” у якасці госця – гэта своеасаблівая адзнака дзейнасці руху ў Беларусі. Гэты Зьезд прадэманстраваў адзінства беларусаў замежжа і іх рашучасць аказваць усебаковую падтрымку дэмакратычным сілам Беларусі. Я зачытаў пасланне ад руху “Зубр”, у якім асабліва падкрэслівалася важнасць такой кансалідацыі.

-- Якія вынікі меў Зьезд?

-- Былі прынятыя рэзалюцыя ды пастанова па стварэньню каардынацыйнай структуры арганізыцыяў палітычных уцекачоў Эўропы - Беларускае Ўніі. Абраныя Рада прадстаўнікоў і каардынатар. Гэта дазволіць прымаць канкрэтныя рашенні аб тым, як беларусы замежжа будуць дапамагаць справе вызвалення радзімы ад дыктатуры. Заснаваны фонд дапамогі апазіцыі. Акрамя таго, мерапрыемства не засталося незаўважаным з боку структур Еўразвязу. На Зьездзе прысутнічалі прадстаўнікі Еўрапарламенту. З імі былі праведзеныя дадатковыя кансультацыі.

-- Якія ўражанні пакінуў З’езд?

-- Самыя пазітыўныя. Нягледзячы на тое, што удзельнікі прадстаўлялі розныя палітычныя партыі і прытрымліваліся розных поглядаў, усе былі ўпэуненыя: Беларусь мусіць быць вольнай, Беларусь мусіць быць у Еўропе. Гэтая ўпэўненасць азначае сапраўднае адзінства.

Белоруссия