Я. Лабановіч: «Рыхтуецца масавая нерэгістрацыя ўсіх апазыцыйных кандыдатаў» :: Хартыя'97 :: Навiны

Згодна з Выбарчым кодэксам не пазьней за 16 верасьня акруговыя камісіі мусяць вынесьці свой вэрдыкт – альбо зацьвердзіць прэтэндэнтаў у статусе кандыдата ў дэпутаты Палаты прадстаўнікоў, альбо адмовіць ім у рэгістрацыі. Цікава, што на папярэдніх выбарах у Палату чатыры гады таму за два дні да заканчэньня рэгістрацыі быў вядомы лёс бальшыні прэтэндэнтаў на дэпутацкія мандаты. Цяпер жа, наадварот, у абсалютнай бальшыні акругаў рэгістраваць кандыдатаў зьбіраюцца 15 і 16 верасьня. Чым можна патлумачыць такую розьніцу ў падыходах да працэсу рэгістрацыі ў 2000-м і 2004-м гадах?

Старшыня менскай гарадзкой арганізацыі АГП, ён жа патэнцыйны кандыдат у дэпутаты па менскай Ясенінскай выбарчай акрузе Яўген Лабановіч у інтэрв’ю “Радыё Свабода” зьвязвае адкладаньне рэгістрацыі на два апошнія дні з аб’яўленым рэфэрэндумам.

“Паводле той інфармацыі, якую я сёньня маю – і многія людзі, якія маюць дачыненьне да ўладаў, пра гэта гавораць – рыхтуецца масавая, 100%, татальная нерэгістрацыя ўсіх апазыцыйных кандыдатаў, каб не даваць ім эфіру перад рэфэрэндумам. Бо, паводле выбарчага кодэксу, дэпутатам мусяць даць эфір. І таму, я лічу, што гэтыя два-тры дні ўлады бяруць не таму, каб роўныя магчымасьці былі ва ўсіх кандыдатаў, а дзеля таго, каб знайсьці нейкі варыянт нерэгістрацыі ўсіх, знайсьці нейкі кампрамат на ўсіх бяз выключэньня”.

Магчыма, ёсьць сэнс выкарыстаць такія дадзеныя: паводле ЦВК, на 110 мандатаў прэтэндуюць 692 асобы. Для параўнаньня: чатыры гады таму прэтэндэнтаў было больш – 769. Найбольш прэтэндэнтаў у Менску – на акругу 7,2 чалавека, найменш – у Гомельскай вобласьці – 5,3.
Минск, Белоруссия