Чарговая хлусня газеты «Звязда» :: Хартыя'97 :: Навiны

Афіцыйная газета “Звязда” ў чарговы раз надрукавала хлусню. Гэтым разам яна апублікавала інфармацію, якая абражае гонар і годнасць аднаго с каардынатараў руху “Зубр” Мікіты Сасіма.

У пятничным нумары газеты было надрукаванае інтэрв’ю з другім сакратаром ЦК БРСМ Ігарам Бузоўскім. У ім “лукамолец” у прыватнасці заявіў: “... Узяць хаця б прыклад з Баранавічамі. Маладыя людзі, навучэнцы каледжа, у якіх не было магчымасці атрымаць рэальную, праўдзівую інфармацыю аб існуючых маладзёжных арганізацыях, паддаліся на правакацыю чыстай вады - і запісаліся ў «Зубр»... А галоўны завадатар інцыдэнту, спадар Сасім, у хуткім часе аказаўся... за мяжой, дзе зараз працягвае вучобу…”.

Моладзь Беларусі сапраўды не мае магчымасці атрымаць праўдзівую інфармацыю аб існуючых маладзёжных арганізацыях, паведаміла на гэта прэс-служба руху «Зубр». У краіне даўно няма незалежных электронных СМІ, і амаль не засталося незалежнай прэсы. Гэта вынік мэтанакіраванай кампаніі супраць свабоды слова. Дзесяткі незалежных газет былі зліквідаваныя, некалькі журналістаў адправіліся за краты. Таму молодзь вымушана будаваць сваі меркаванні аб сітуацыі ў краіне па хлусне, якая публікуецца на старонках “Звязды” і іншых рупараў афіцыйнай прапаганды.

Між тым, сабакі брэшуць, а караван ідзе. Мікіта Сасім, які быў выключаны з баранавіцкага коледжа лёгкай прамысловасці за сваю палітычную дзейнасць, нікуды не з’ехаў. Малады патрыёт знаходзіцца ў Беларусі і працягвае барацьбу супраць дыктатарскага рэжыма.

“Мяркуючы па ўсім, афіцыйная прэса зразумела, што ніякага кампрамата на беларускіх змагароў за свабоду яна не знойдзе, і перайшла да адкрытай хлусні. Падчас падзей у Баранавічах на маладых людзей, якія выказалі свой пратэст прымусоваму загону у “лукамол”, афіцыйная прэса выліла столькі бруду, што зараз я не здзіўлены. Я больш здзіўлены ўзроўнем некампетэнтнасці прыдворных прапагандыстаў, якія смеюць называць сябе журналістамі,” - пракаментаваў публікацыю “Звязды” Мікіта Сасім.
Минск, Белоруссия