Гарадзенскім журналістам забаранілі пікет пратэсту :: Хартыя'97 :: Навiны

Гарадзенскі гарадскі выканаўчы камітэт адмовіў старшыні мясцовай філіі БАЖ Паўлу Мажэйку ў правядзенні 4 кастрычніка пікета пратэсту ў гарадскім парку імя Жылібера. У адмове, падпісанай намеснікам старшыні гарвыканкама Валянцінам Лявонавым, адзначаецца: “Гродзенскі гарадскі выканаўчы камітэт не можа даць згоды на правядзенне 4 кастрычніка 2004 года ... ў сувязі з парушэннем артыкула 5 Закона Рэспублікі Беларусь “Аб масавых мерапрыемствах у Рэспубліцы Беларусь”. Што канкрэтна парушыў журналіст, складаючы заяўку на пікетаванне, у лісце не гаворыцца.

Падставай пікетавання сталася судовая справа распачатая пракуратурай супраць галоўнай рэдактаркі газеты “Біржа інфармацыі” Алены Раўбецкай па абвінавачанні ў знявазе гонару і годнасці прэзідэнта Рэспублікі Беларусь. 30 верасня Ленінскі раённы суд пакараў журналістку штрафам у памеры амаль 1 мільён 300 тысяч рублёў. Пікетам пратэсту гарадзенскія журналісты мелі намер інфармаваць жыхароў горада аб чарговым узмацненні ціску на незалежную прэсу ў Беларусі.

Тым не менш, як паведамляе ГроднаNews, журналісты маюць намер выйсці на пікетаванне.

5 красавіка 2002 года гарадзенскія журналісты арганізавалі ў горадзе несанкцыянаваныя ўладамі акцыі пратэсту супраць судовага працэсу над журналістамі газеты ПАГОНЯ. У выніку, 13 журналістаў былі затрыманыя супрацоўнікамі міліцыі і атрымалі розныя пакаранні, ад папярэджання да 15 сутак арышту. За апошнія чатыры гады гарадскія ўлады не далі ніводнага дазволу на правядзенне ў горадзе акцый пратэсту.
Минск, Белоруссия