Міжнародныя арганізацыі заклікаюць спыніць пераслед прэсы ў Беларусі :: Хартыя'97 :: Навiны

Адразу некалькі міжнародных арганізацый звярнуліся да Аляксандра Лукашэнкі з нагоды закрыцця ў краіне цэлага шэрагу недзяржаўных газет. "Сусветная асацыяцыя газет" (WAN) і "Сусветны форум газет" (WEF), якія базуюцца ў Парыжы, накіравалі А. Лукашэнку ліст, у якім заявілі, што пасля закрыцця столькіх выданняў парламенцкія выбары "не могуць заслугоўваць даверу". У той жа дзень да А. Лукашэнкі звярнуўся "Міжнародны інстытут прэсы" - сусветная сетка рэдактараў, кіраўнікоў СМІ і вядучых журналістаў, якая базуецца ў Вене. Яны таксама выказваюць глыбокую заклапочанасць закрыццём некалькіх газет напярэдадні кастрычніцкіх выбараў у беларускі парламент.

На думку МІП, прыпыненне вялікай колькасці папулярных газет па тэхнічных прычынах падчас выбарчай кампаніі выклікае недавер да загадаў аб іх прыпыненні. МІП бачыць у дзеяннях уладаў яшчэ адну спробу прымусіць замаўчаць тыя медыі, якія крытычна ставяцца да пазіцыі ўраду. МІП заклікаў беларускага лідара спыніць пераслед СМІ і зрабіць усё магчымае для таго, каб журналісты ў Беларусі маглі выконваць свае прафесійныя абавязкі, не баючыся сутыкнуцца з агрэсіяй у свой бок, паведамляе прэс-служба БАЖ.

Нагадаем, што у гэтым годзе ўжо прыпыняліся 16 выданняў. 9 з іх Мінінфармацыі прыпыніла за апошнія паўтара месяцы: "Навінкі", "Новая газета Сморгони", "Алло!, Куплю, продам, меняю", "Время", "Предпринимательская газета", "Любой каприз", "Региональная газета", "Народный предприниматель", "Региональные ведомости".

Минск, Белоруссия