Дэмакратычных кандыдатаў пазбавілі рэгістрацыі :: Хартыя'97 :: Навiны

Выбарчыя камісіі 95-й і 96-й менскіх акругаў скасавалі рэгістрацыю кандыдатаў ад Аб’яднанай грамадзянскай партыі Валянціны Палевіковай і Аляксандра Дабравольскага. Палевікова і Дабравольскі тлумачаць гэтыя дзеяньні выбарчых камісіяў замовай ўладаў і зьбіраюцца абскарджваць рашэньні акруговых камісіяў у ЦВК.

Паседжаньні камісій 95-й і 96-й акругаў праходзілі адначасова, у суседніх кабінэтах адміністрацыі Кастрычніцкага раёна Менску.

У камісію 96-й акругі нібыта прыйшлі некалькі зваротаў вэтэранаў з паведамленьнямі, што нейкія маладыя людзі раскідвалі па паштовых скрынях ўлёткі Дабравольскага, а разам зь ёю ўлётку "Скажы Лукашэнку – не!" і газэту "Неделя" з антыпрэзыдэнцкім зьместам.

Страшыня камісіі Мікалай Білін заявіў, што ў выходныя была праведзеная праверка сябрамі камісіі, і “факты пацьвердзіліся”. У гэтых фактах камісія заўважыла парушэньне закону: подкуп выбарцаў, перавышэньне сумаў, выдзеленых на агітацыю, і распаўсюд ананімных матэрыялаў.

Спадар Дабравольскі зазначыў, што давераныя асобы раздавалі толькі ягоныя ўлёткі, але і распаўсюд матэрыялаў да рэфэрэндуму, у тым ліку легальных газэт не зьяўляецца крыміналам. Тым больш, што камісія гэтак і не высьветліла, хто ж распаўсюджваў гэтыя матэрыялы.

Аляксандар Дабравольскі і ягоныя давераныя асобы выказалі ўпэўненасьць, што гэта правакацыя на замову ўладаў.

На Валянціну Палевікову таксама быццам бы прыйшлі лісты выбаршчыкаў, якія даказвалі, што яна нібыта распаўсюджвала ля Чэрвеньскага рынку газэту "Народная воля" са сваім партрэтам. Камісія палічыла гэта перавышэньнем выдзеленых сродкаў на агітацыю і подкупам выбарцаў.

Валянціна Палевікаова ўпэўненая, што ўлады правялі ў акругах апытаньні, і калі ўбачылі вынікі, то каб не дапусьціць абраньня яе і Дабравольскага пайшлі на неправамернае скасаваньне іх рэгістрацыі.
Минск, Белоруссия