Пракутура распачала крымінальную справу за выкрыццё фактаў фальсіфікацый падчас галасаваньня :: Хартыя'97 :: Навiны

Пракуратура Менску распачала крымінальную справу па факце прэсавай канфэрэнцыі аб мажлівых фальсыфікацыях падчас галасаваньня. 15 кастрычніка прадстаўнікі ініцыятывы “За справядлівыя выбары” й лідэры апазыцыйных партыяў прадэманстравалі журналістам праекты пратаколаў участковых выбарчых камісіяў з гатовымі лічбамі, а таксама зводныя табліцы па акрузе з разьмеркаваньнем галасоў на ўчастках.

Копіі падрыхтаваных пратаколаў і табліцаў паралельна патрапілі да актывіста ініцыятывы “За справядлівыя выбары” Анатоля Фёдарава й да лідэра ПКБ Сяргея Калякіна. У пратаколах ужо запісаныя вынікі на карысьць А. Лукашэнкі і кандыдатаў ад улады.

Як паведамляе “Радыё Свабода”, 15 кастрычніка на гэта адрэагаваў пракурор Менску Мікалай Кулік, які ў інтэрвію Беларускаму тэлебачаньню заявіў пра гэту прэсавую канфэрэнцыю наступнае:

“Яе ўдзельнікамі распаўсюджаныя адпачатна ілжывыя й ганебныя для прэзыдэнта Рэспублікі Беларусь і іншых службовых асобаў прыдумкі, якія датычацца маючых адбыцца рэспубліканскага рэфэрэндуму й выбараў”.

Пракурор Кулік дадаў, што “матэрыялы ўтрымліваюць дастатковыя зьвесткі, якія паказваюць на прыкметы злачынстваў” паводле двух артыкулаў Крымінальнага кодэксу – аб паклёпе ды аб паклёпе на прэзыдэнта. Таму пракуратура Менску распачала па гэтых артыкулах кодэксу адпаведную крымінальную справу.

Белоруссия