Аляксандр Васiльяў: «Нават калi прыйдзецца памерцi ў турме, на каленi мяне яны не паставяць» :: Хартыя'97 :: Навiны

Палiтзняволены Аляксандр Васiльяў, якi знаходзiцца ў Гродзенскай турме, адбывае пакаранне ў нелюдзкiх умовах. Пра гэта распавяла ПАГОНI жонка вязня Наталля Васiльява. У панядзелак 18 кастрычнiка яна ўпершыню наведала свайго мужа ў Гродзенскай турме.

- Умовы ўтрымання проста жахлiвыя. У камеры дзе ён сядзiць разам з iм знаходзiцца 28 чалавек. Ложкаў толькi 18. Таму спаць яны могуць толькi па чарзе, - распавядае Наталля Васiльява.

Паводле яе словаў у камеры жахлiвая антысанiтарыя.

- Там нават пацукi бегаюць. А гарачай вады каб памыцца няма. Ён кажа, што ўжо месяц не можа нармальна памыцца. Чаго ж тады здзiўляцца, што ў турме эпiдэмiя педыкулёза, - гаворыць яна.

У Аляксандра Васiльява ёсць шэраг хранiчных захворванняў. Аднак атрымаць нармальнай медычнай папамогi ён не можа.

Акрамя таго Васiльяў не можа есцi турэмную ежу. Таму вымушаны фактычна галадаць.

- У яго хворы страўнiк, а гэтую “ежу” ён проста не можа пераварыць. Вось таму ён амаль нiчога не есць. Толькi калi я перадам нешта, - гаворыць Наталля Васiльява.

Не гледзячы на гэтыя нечалавечыя ўмовы ўтрымання Васiльяў не падае духам.

- Нават калi прыйдзецца памерцi ў турме, на каленi мяне яны не паставяць, - прасiў перадаць на волю Аляксандр Васiльяў.

Нагадаем, што лiдар гродзенскiх прадпрымальнiкаў Аляксандр Васiльяў разам з Валерыям Леванеўскiм прызнаны вiнаватым ў публiчнай знявазе прэзiдэнта Аляксандра Лукашэнкi. Суд Ленінскага раёна прыгаварыў яго да 2 гадоў пазбаўлення волi ў папраўча-трудавой калонii агульнага рэжыму. Учора калегiя Гродзенскага абласнога суда пад старшынствам суддзi Аляксандра Корзуна падцвердзiла законнасць прысуда.

Андрэй Адлянiцкi
pahonia.promedia.by
Минск, Белоруссия lllll