Ёшка Фішэр не выключае ўвядзеньня санкцыяў адносна беларускіх уладаў :: Хартыя'97 :: Навiны

Міністар замежных справаў Нямеччыны Ёшка Фішэр выказаў сваю заклапочанасьць ў зьвязку зь беларускімі падзеямі. Учора ў Бэрліне ён выступіў з рэзкай крытыкай выбараў і рэфэрэндуму, што адбыліся ў Беларусі. Як перадае нямецкае агенцтва DPA, спадар Фішэр заявіў наступнае: “Урад Нямеччыны надзвычай занепакоены тымі страшэннымі недахопамі падчас беларускіх парлямэнцкіх выбараў, якія ўстанавілі назіральнікі АБСЭ. Гэта ніяк не адпавядае тым патрабаваньням да свабодных выбараў, якія абавязаўся выконваць Менск. Тое ж самае тычыцца і рэфэрэндуму”. Кіраўнік нямецкага МЗС сказаў, што нельга выключыць увядзеньня санкцыяў адносна беларускіх уладаў. Паводле нямецкіх назіральнікаў, заява кіраўніка замежнапалітычнага ведамства ФРГ зьяўляецца самай жорсткай з тых, што зробленыя за апошні час на адрас афіцыйнага Менску.

Міністар замежных справаў Нямеччыны Ёшка Фішар заявіў, што выбары і рэфэрэндум, што адбыліся ў Беларусі, ніякім чынам нельга ахарактарызаваць як свабодныя і справядлівыя.

Нямецкае агенцтва DPA таксама паведамляе, што ў Бэрліне вельмі заклапочаныя апошнімі гвалтоўнымі захадамі беларускіх уладаў супраць мірных пратэстаў апазыцыі.

Тым часам, сябра камісіі Бундэстагу па зьнешняй палітыцы Ўта Цапф, якая нядаўна наведала Менск у якасьці назіральніцы АБСЭ, у размове зь карэспандэнтам «Радыё Свабода» паведаміла, што ў Бэрліне прыступаюць да выпрацоўкі канкрэтных крокаў падтрымкі беларускай апазыцыі.

“Нам трэба ня проста падтрымаць апазыцыю, але і таксама і абараніць яе”, – заявіла Ўта Цапф. Паводле ейных словаў, беларускае пытаньне будзе абмяркоўвацца ў Бундэстагу цягам бліжэйшых тыдняў.
Минск, Белоруссия