Міліцыя расшуквае гарадзенскіх журналістаў :: Хартыя'97 :: Навiны

Гродзенская міліцыя хоча прыцягнуць да адказнасці журналістаў, якія 4 кастрычніка правялі ў цэнтры Гродна пікет пратэсту супраць узмацнення ціску на незалежную прэсу. 22 кастрычніка капітан міліцыі, старшы інспектар аддзела прафілактыкі і аховы правапарадку Ленінскага РАУС Гродна Пётр Ленец у тэлефоннай размове запрасіў старшыню Гарадзенскай філіі Беларускай асацыяцыі журналістаў Паўла Мажэйку прыйсці ў аддзел міліцыі і даць тлумачэнні.

Журналіст адмовіўся і паведаміў, што будзе рэагаваць толькі на афіцыйныя патрабаванні супрацоўнікаў міліцыі.

Журналістка Юля Коцкая, якая таксама брала ўдзел у акцыі пратэсту паведаміла ГроднаNEWS, што ўвечары 21 кастрычніка па адрасу дзе яна прапісана з’явіліся тры супрацоўнікі міліцыі. Таксама міліцыянты шукаюць іншых удзельнікаў пікету Ірыну Чарняўку, Наталлю і Анатоля Макушыных.

Пяць гарадзенскіх журналістаў 4 кастрычніка сталі ў пікет пратэсту на самай люднай вуліцы Гродна Савецкай, пратэстуючы супраць узмацнення ціску на незалежную прэсу. Нагодай для правядзення акцыі стала асуджэнне на мінулым тыдні рэдактаркі "Биржи информации" Алены Раўбецкай па абвінавачанні ў распаўсюдзе абразлівай для прэзідэнта інфармацыі. Журналісты трымалі ў руках аркушы паперы са словамі "У Гродне судзяць журналістаў!!!"
Минск, Белоруссия