У Гародні затрымалі журналіста :: Хартыя'97 :: Навiны

27 кастрычніка каля 12.30 ў Гродне міліцыя затрымала кіраўніка гарадзенскай філіі Беларускай асацыяцыі журналістаў (БАЖ), журналіста зачыненай газеты "Пагоня" Паўла Мажэйку. Пра гэта паведаміла БАЖ гарадзенская журналістка Ірына Чарняўка, якой Павел паспеў патэлефанаваць пасля затрымання. Паводле папярэдняй інфармацыі, сёння ж у 14.00 ў Ленінскім раённым судзе адбудзецца разгляд яго адміністратыўнай справы.

Як паспеў паведаміць па тэлефоне Мажэйка, затрыманне праводзіў капітан міліцыі старшы інспектар Пётр Ленец. Паводле папярэдняй інфармацыі, журналіст знаходзіцца ў аддзеле прафілактыкі і аховы правапарадку Ленінскага РАУС Гродна. Між тым, дзяжурны Ленінскага РАУС заявіў прэс-службе БАЖ, што ні пра якое затрыманне не ведае; тэлефон ў аддзеле аховы правапарадку ўвогуле не адказвае.

Затрыманне П. Мажэйкі, хутчэй за ўсё, звязана з пікетам, які гарадзенскія журналісты правялі 4 кастрычніка. Пяць гарадзенскіх журналістаў зладзілі пікет, пратэстуючы супраць узмацнення ціску на незалежную прэсу. Нагодай для правядзення акцыі стаў абвінаваўшы прысуд рэдактарцы "Биржи информации" Алене Раўбецкай, якой інкрымінавалі распаўсюд абразлівай для прэзідэнта інфармацыі. Журналісты трымалі ў руках аркушы паперы са словамі "У Гродне судзяць журналістаў!!!"

Белоруссия