Суд часткова задаволіў зыск Яўгена Крыжаноўскага да «БДГ» :: Хартыя'97 :: Навiны

Тры мільёны рублёў з "Белорусской деловой газеты" і 500 тысяч рублёў з журналіста Сяргея Сацука павінны быць спагнаныя на карысць мастацкага кіраўніка тэатра "Хрыстафор" Яўгена Крыжаноўскага. Такое рашэнне прыняў 2 лістапада суд Кастрычніцкага раёна Мінска, разгледзеўшы зыск аб кампенсацыі маральных стратаў Крыжаноўскага. Першапачаткова Крыжаноўскі хацеў спагнаць 100 мільёнаў рублёў з газеты і 20 мільёнаў - з журналіста. Рэдакцыя збіраецца абскарджваць рашэнне суда, паведамляе прэс-служба БАЖ.

Падставай для судовага разбіральніцтва стала публікацыя "Хорошо пошутили, или Смеется тот, кто смеется без последствий", якая з`явілася ў "БДГ" 5 сакавіка 2004 года. У артыкуле Сацука ішла гаворка пра магчымы ўдзел Крыжаноўскага і яго фірмы "Хрыстафор-Клірынг" у дзейнасці адной з мінскіх "фінансавых пірамід", з-за якой панеслі фінансавыя страты шмат якія беларускія прадпрыемствы.

Крыжаноўскі ўжо ў красавіку падаваў у суд зыск аб абароне гонару і годнасці з нагоды гэтай жа публікацыі, і суд прызнаў распаўсюджаныя газетай звесткі непраўдзівымі. Пасля гэтага "БДГ" апублікавала частку пастановы суда, датычную абвяржэння распаўсюджаных газетай звестак. Крыжаноўскага гэта не задаволіла, і ён зноў звярнуўся ў суд, гэтым разам патрабуючы матэрыяльнай кампенсацыі.
Минск, Белоруссия