Прэсавы сакратар КГБ пра справу Марыніча: «Нічога ня будзе мяняцца да суду» :: Хартыя'97 :: Навiны

10 лістапада сьледчыя КГБ плянуюць завяршыць расьсьледаваньне крымінальнай справы Міхаіла Марыніча, былога міністра і амбасадара, якога вось ўжо паўгода ўтрымліваюць у вязьніцы. Справу мусілі завяршыць на мінулым тыдні, і ўжо паведамілі пра гэта адвакатам абвінавачанага, але, як аказалася, паводле тэхнічных прычынаў завяршэньне расьсьледаваньня зноў адклалі. І вось сьледчыя абяцаюць сёньня перадаць справу Марынічу на азнаямленьне.

Якім можа быць далейшы лёс справы Марыніча? Прэсавы сакратар КГБ Аляксандр Базанаў у інтэрв’ю “Радыё Свабода” уяўляе яго гэтак:

“Як толькі абарона Марыніча спыняе знаёміцца, справа перадаецца назіраючаму пракурору і ўсё, ідзе у суд”.

А вось магчымасьць зьмены меры стрыманьня для Міхаіла Марыніча Аляксандр Базанаў выключае:

“Пра тое, што зьмякчацца нешта будзе, не было размовы. Відавочна, што нічога ня будзе мяняцца да суду”.

Нагадаем, Міхаіла Марыніча абвінавачваюць адразу у чатырох злачынствах : незаконным захоўваньні зброі, крадзяжы маёмасьці і сакрэтнага дакумэнта ды ў невяртаньні пячаткі грамадзкай арганізацыі. Аднак абаронца Вера Страмкоўская перакананая, што сьледзтва ня мае доказаў віны Марыніча.

“Гэта ўсё наўмысныя злачынствы, але якраз доказаў таго, што Марыніч гэта зрабіў наўмысна, у сьледзтва і няма”, -- паведамила Страмкоўская “Радыё Свабода”.

Адвакат кажа, што будзе патрабаваць, каб пракурор увогуле спыніў крымінальны перасьлед былога міністра. На думку абаронцы, суд будзе мець цалкам законныя падставы не прымаць да разгляду такую бяздоказную справу.

Трэцім варыянтам разьвіцьця падзеяў можа быць рашэньне назіраючага пракурора падтрымаць абвінавачваньне ня ў поўным аб’ёме, а толькі часткова. І тады шанцы на зьмену меры стрыманьня для Міхаіла Марыінча павялічацца, лічыць Вера Страмкоўская.

Міхаіл Марыніч знаходзіцца пад вартай ужо з 26 красавіка. Паводле дактароў, у яго значна пагоршылася здароўе, між тым у ізалятары КГБ няма патрэбных умоваў для аказаньня вязьням мэдычнай дапамогі.

Беларускія ўлады неаднаразова заяўлялі, што справа Міхаіла Марыніча – “выключна крымінальная”. Між тым, сам Марыніч перакананы ў палітычных прычынах ягонага перасьледу. Нагадаем, былы міністар і амбасадар перайшоў на бок апазыцыі і зьбіраўся ўдзельнічаць у будучых прэзыдэнцкіх выбарах.
Минск, Белоруссия mmmmm