Праваабаронцы выяўляюць факты катаваньняў супраць удзельнікаў акцый пратэсту :: Хартыя'97 :: Навiны

Праваабарончы цэнтр “Вясна” рыхтуе “Папярэдні маніторынг па фактах выкарыстаньня катаваньняў ды іншых бесчалавеных відаў абыходжаньня ў адносінах грамадзянаў Беларусі”. Асобным разьдзелам маніторынга стане “Зьбіцьцё ўдзельнікаў акцый пратэсту супраць сфальсіфікаваных вынікаў выбараў і рэферэндума 17 кастрычніка 2004 года”. З кожным днем такіх фактаў становіцца ўсе болей. Сёньня Зьміцер Бародка, адзін з лідараў Еўрапейскай кааліцыі “Свабодная Беларусь”, удзельнік акцыі пратэсту супраць фальсіфікаваных вынікаў выбараў і рэферэндума даў у ПЦ “Вясна” наступную інфармацыю:

“Я, Бародка Зьміцер, быў зьбіты супрацоўнкамі Мінскага АМАПУ пасьля таго, як я быў затрыманы падчас акцыі пратэсту 20 кастрыніка 2004 года. Мяне ўкінулі ў аўтобус з АМАПам, і некалькі чалавек пачалі мяне зьбіваць. Білі па твары, па нырках. У некалькіх месцах мне парвалі куртку. Пасьля на некалькі хвілінаў яны супакоіліся. Але з мяне зазваніў мабільны тэлефон, і я пачаў размаўляць па ім. Тады некалькі чалавек (прыкладна 4-5) накінуліся на мяне ізноў. Яны павалілі мяне ан падлогу, закруцілі руку за сьпіну і адабралі тэлефон. Наступіўшы нагой мне на галаву некалькі разоў ударылі па сьпіне нагамі. Пасьля чаго мне не дазвалялі падняцца і сесьці. На падлозе я праляжаў хвілінаў 15, пасьля чаго мне ўрэшце рэашт дазволілі падняцца”.
Минск, Белоруссия