Суд разгледзіць скаргу Вольгі Завадскай на пракуратуру :: Хартыя'97 :: Навiны

25 лістапада ў Мінскім гарадзкім судзе будзе слухацца справа па скарзе Вольгі Завадзкай на дзеяньні пракурорскіх работнікаў, якія праігнаравалі яе патрабаваньне наноў разгледзець справу адносна выкраданьня яе сына Дзьмітрыя Завадзкага пасьля прэс-канферэнцыі А. Лукашэнкі.

17 лістапада маці зьніклага ў ліпені 2000 году тэлеапаретара ОРТ Дзьмітрыя Завадзкага атрымала паведамленьне з Мінскага гарадзкога суда, у якім сказана, што 25 лістапада ў 14.00 у Мінскім гарадзкім судзе будзе слухацца грамадзянская справа па яе скарзе на дзеяньні службовых асобаў (супрацоўнікаў Рэспубліканскай пракуратуры), якія ўшчамляюць правы грамадзянаў.

Нагадаем, што 20 ліпеня бягучага году падчас прэс-канферэнцыі А.Лукашэнка заявіў, што мае “некаторыя дакументы” і калі ён іх зараз абнародуе “то справа Завадзкага пераўтворыцца ў антысправу”.

На падставе публічна абвешчаных зьвестак, маці журналіста Вольга Завадзкая падала заяву ў Рэспубліканскую пракуратуру аб узбуджэньні крымінальнай справы аднасна яе сына “па наноў адкрыўшыхся абставінах” у сувязі з выступам А. Лукашэнкі.

Пракуратура Рэспублікі Беларусь ніяк не адрэагавала на заяву маці Дзьмітрыя Завадзкага, і яна падала скаргу на незаконныя дзеяньні супрацоўнікаў пракуратуры ў суд з патрабаваннем абавязаць супрацоўнікаў пракуратуры даць ёй матываваны адказ.

Разам з тым, у Рэспубліканскай пракуратуры Вользе Рыгораўне сказалі, што адказу на яе заяву ня будзе, паколькі заяву забраў асабіста генпракурор Віктар Шэйман і ніякага распараджэньня па гэтай справе супрацоўнікам пракуратуры не даваў, паведаміў праваабрончы цэнтр “Вясна”.
Минск, Белоруссия