Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
На тры месяцы прыпынены выхад газеты «Бiржа iнфармацыi» 13:55, 29/11/2004, фота ByMedia.net
Загадам мiнiстра iнфармацыi Ўладзiмiра Русакевiча на тры месяцы прыпынены выхад недзяржаўнай гарадзенскай газеты “Бiржа iнфармацыi”. Падставай для гэтага стала рашэнне суда Ленiнскага раёна Гродна аб пакараннi галоўнага рэдактара газеты Алены Раўбецкай штрафам за артыкул “Здрада iменем народа”. Суд палiчыў, што гэты артыкул зневажае “гонар i годнасць” прэзiдэнта Аляксандра Лукашэнкi.
«За адное i тое мяне двойчы караюць», - заявiла ПАГОНI Алена Раўбецкая. Паводле яе словаў, рэдакцыя газеты абавязкова будзе абскаржваць загад мiнiстра ў судовым парадку. Акрамя гэтага, плануецца правядзенне акцыi пратэсту i арганiзацыi зваротаў чытачоў выдання да мiнiстра iнфармацыi з патрабаваннем адмянiць загад.
На думку Алены Раўбецкай, рашэнне аб прыпыненнi выдання на тры месяцы пагражае iснаванню газеты.
- Гэта вельмi моцны ўдар па выданню. Цяпер iдзе падпiсная кампанiя i ў гэты момант нас зачыняюць. Калi за два-тры тыднi мы не здолеем адстаяць газету, я нават не хачу прагназаваць, што можа здарыцца, - гаворыць Раўбецкая.
“Бiржа iнфармацыi” з’яўлялася адзiным недзяржаўным грамадска-палiтычным выданнем у Гродне.
