Клаўдыя Нольтэ: «Падзеі ва Ўкраіне стануць сыгналам для Беларусі» :: Хартыя'97 :: Навiны

Дэпутатка Бундэстагу, дакладчыца фракцыі ХДС/ХСС па Беларусі Клаўдыя Нольтэ, якая гэтымі днямі была ў Кіеве, перакананая, што падзеі ва Ўкраіне стануць сыгналам як для беларускага грамадзтва, так і для Эўразьвязу, які адказны за тое, каб Беларусь не апынулася ў цені ўкраінскіх падзеяў. “Па-першае, я застаюся пад вялікім уражаньнем ад таго, што зараз адбываецца ва Ўкраіне. Гэта дакладны знак таго, што ў людзей вельмі высокая грамадзянская і палітычная сьвядомасьць. Я спадзяюся на тое, што падзеі ва Ўкраіне стануць сыгналам для тых краінаў, дзе выбары не зьяўляюцца ні свабоднымі, ні празрыстымі, дзе назіраюцца фальшаваньні ў часе падліку галасоў; што яны стануць сапраўдным імпульсам для дыскусіяў адносна далейшага шляху. Што да пазыцыі Эўразьвязу, то ягоныя краіны-сябры мусяць быць адказнымі за тое, каб Беларусь не была забытай на тле ўкраінскіх падзеяў», -- заявила Клаўдыя Нольтэ ў інтэрвію “Радыё Свабода”.

“Я ведаю з уласнага досьведу, што Эўропа па-ранейшаму зь цікавасьцю назірае за Беларусьсю. Напрыканцы тыдня ў Вільні адбудзецца мерапрыемства з удзелам высокіх палітычных і грамадзкіх дзеячаў Эўропы, якое будзе прысьвечана як Украіне, так і Беларусі.

Нашая фракцыя ХДС/ХСС будзе надалей выносіць беларускае пытаньне на парадак дня Бундэстагу. Зараз мы рыхтуем праект новай рэзалюцыі па Беларусі, які, як мы спадзяемся, будзе падтрыманы іншымі фракцыямі, у тым ліку на ўзроўні ўраду. Я сама рыхтую парлямэнцкі запыт да нашага ўраду з тым, каб даведацца, якую ролю адыграла Беларусь на саміце Эўразьвяз-Расея. Задачы нашых палітыкаў, каб ніводная краіна-суседка Эўрапейскага Зьвязу не апынулася па-за нашай увагай, нават у тым выпадку, калі ўся ўвага зьвернутая ў бок Украіны”, -- паведаміла дэпутатка.
Минск, Белоруссия