Саюз пісьменьнікаў атрымаў другое папярэджаньне Мінюсту :: Хартыя'97 :: Навiны

Пісьмовае папярэджаньне вынесьлі за тое, што Берасьцейскае абласное аддзяленьне пісьменьніцкай арганізацыі з чэрвеня 2001 году не прадстаўляе ў падатковую інспэкцыю штомесячнай справаздачнасьці, чым парушае адпаведнае заканадаўства. Ніякае камэрцыйнае дзейнасьці ні гэтае аддзяленьне, ні іншыя пісьменьніцкія суполкі не вядуць.

Атрыманае папярэджаньне супала па часе з фактычнаю забаронаю пісьменьнікам выкарыстоўваць вялікую залю Дому літаратара для сваіх імпрэзаў і пагрозаю высяленьня з гэтага будынку сакратарыяту Саюзу пісьменьнікаў, перадае «Радыё Свабода». Намесьнік старшыні Саюзу пісьменьнікаў Барыс Пятровіч гаворыць, што парушэньне, за якое атрыманае папярэджаньне Мінюсту, дробнае й можа быць хутка выпраўленае. Якім чынам, гэта вырашыць 6 сьнежня нечарговая рада арганізацыі.

Праблема, аднак, у тым, што гэта ўжо другое на працягу году папярэджаньне Саюзу пісьменьнікаў:

-- Першае папярэджаньне ў нас было за тое, што ў нас вісіць шыльда з гербам “Пагоня”, і за тое, што ў нас пячатка няправільная была. А трэці пункт там быў, што ў нас у арганізацыі ёсьць сябры, якія жывуць за межамі Беларусі. Мы на гэта тады адказалі, але нам таго папярэджаньня не зьнялі. А па трэцім папярэджаньні арганізацыя можа быць па заканадаўстве проста закрытая, -- паведаміў Барыс Пятровіч. -- Цяпер нас прымушаюць падпісаць дамову аб тым, што мы перадаем усе памяшканьні, якія маем, галоўнаму гаспадарчаму ўпраўленьню адміністрацыі прэзыдэнта.

На фота: Алесь Пашкевіч, старшыня Саюзу пісьменьнікаў