Заява Амбасады ЗША наконт рэпрэсіўных мер супраць грамадзянскай супольнасці :: Хартыя'97 :: Навiны

Злучаныя Штаты Амерыкі з узрастаючай занепакоенасцю назіраюць за ўзмацненнем нападаў на незалежную грамадзянскую супольнасць у Беларусі. У апошнія два гады ЗША неаднаразова выказваліся супраць сістэматычных дзеянняў ураду Лукашэнкі па ўдушэнні незалежных галасоў у краіне. Сітуацыя пасля кастрычніцкіх выбараў, якія самі былі відавочна недэмакратычнымі, паказвае, што гэты ўсціск расце. Пакуль беларускі ўрад імкнецца ўпісаць свае рэпрэсіўныя дзеянні ў прававое поле, добра бачна, што гэтыя дзеянні накіраваныя супраць нямногіх незалежных галасоў, што яшчэ засталіся ў Беларусі, па палітычных прычынах.

Вось некаторыя з гэтых дзеянняў:

· Выхад шэрагу газет быў прыпынены; газеты альбо іх супрацоўнікі аштрафаваныя. Сярод такіх выданняў – “Біржа інфармацыі”, “Барысаўскія навіны”, “Местная газета”, “Неделя” і “Рэгіянальныя ведамасці”. Іншыя газеты атрымалі папярэджанні.

· Шматлікія людзі былі арыштаваныя і аштрафаваныя проста за распаўсюджванне інфармацыі. Такія выпадкі мелі месца ў Свіслачы, Горках, Жлобіне, Мінску, Гомелі, Барысаве, Магілёве, Гродне, Баранавічах і Бабруйску.

· Іншыя былі арыштаваныя ці аштрафаваныя за мірныя дэманстрацыі, права на якія гарантавана артыкулам 21 Усеагульнай дэкларацыі правоў чалавека. Больш за 60 чалавек былі арыштаваныя за ўдзел у мірных сходах у Мінску ў кастрычніку, некаторыя з іх – амаль праз месяц пасля гэтага.

· Рэдактар “Местной газеты” Андрэй Шантаровіч быў аштрафаваны на 1200000 рублёў за правядзенне галадоўкі, якую суд вызначыў як “несанкцыянаваную дэманстрацыю”.

· Гары Паганяйлу, намесніку старшыні Беларускага хельсінкскага камітэта, пагражае да пяці гадоў турэмнага зняволення за тое, што ў інтэрв’ю швецкаму тэлеканалу TV 4 ён паўтарыў сцвярджэнні, зробленыя Парламенцкай Асамблеяй Савета Еўропы, аб тым, што шэраг высокапастаўленых беларускіх чыноўнікаў мелі дачыненне да палітычных знікненняў.

На жаль, гэта ўсяго некалькі прыкладаў парушэння правоў чалавека, якія мелі месца ў Беларусі ў апошнія два месяцы. Па кантрасту з жорсткімі санкцыямі, прымененымі супраць незалежнай грамадзянскай супольнасці за спробу мірнага выкарыстання сваіх асноўных правоў, урад Беларусі не зрабіў аніякіх спробаў прыцягнуць да адказнасці тых асоб, па ўсёй верагоднасці афіцэраў міліцыі, якія жорстка збілі старшыню АГП Анатоля Лябедзьку і журналістаў Віктара Кузьміна і Канстанціна Марозава 19 кастрычніка, а таксама журналіста Паўла Шарамета 18 кастрычніка.

З-за гэтых дзеянняў Беларусь мае адзін з самых нізкіх рэйтынгаў у свеце па ўзроўні свабоды сродкаў масавай інфармацыі. Гэтыя дзеянні відавочна парушаюць артыкул 19 Усеагульнай дэкларацыі правоў чалавека, у якім сцвярджаецца, што кожны мае права “мець уласныя погляды без умяшальніцтва і шукаць, атрымліваць і перадаваць інфармацыю і ідэі праз сродкі масавай інфармацыі”. Злучаныя Штаты Амерыкі заклікаюць урад Беларусі прытрымлівацца гэтых міжнародна прызнаных асноўных правоў чалавека і сваіх абавязацельстваў па выкананні Усеагульнай дэкларацыі правоў чалавека.
Минск, Белоруссия