Стратэгія грамадзянскіх дзеяньняў :: Хартыя'97 :: Навiны

Паседжаньне Рады грамадзянскіх ініцыятываў “Свабодная Беларусь” адбылося ў Менску 11 студзеня. У ім прынялі ўдзел прадстаўнікі грамадзянскіх ініцыятываў "Мы памятаем", "Свабоду палітзьняволеным!", "Хартыя`97", "Волат", "Ветэраны за дэмакратыю", Агульнарэспубліканскі Страйкам прадпрымальнікаў, "TERRA-Канвэнцыя", "Антыфашысцкае дзеяньне". "Відавочна, што дзеючая ўлада не дазволіць правесьці ў Беларусі дэмакратычныя, справядлівыя й празрыстыя выбары, а, адпаведна, любая выбарчая кампанія можа стаць толькі штуршком да палітычных трансфармацый і эканамічных рэформ", - гаворыцца ў заяве, прынятай па выніках паседжаньня – “Беларусь падыйшла да такога моманту, калі дэмакратычным сілам неабходна выпрацаваць новую дзейсную стратэгію, якая дазволіць кардынальна зьмяніць сітуацыю ў краіне". Удзельнікі Рады заявілі аб сваім намеры "засяродзіць свае высілкі на распрацоўцы эфектыўнай стратэгіі грамадзянскіх дзеяньняў, грамадзкім кантролі забесьпячэньня правоў ды свабод грамадзянаў, стварэньні дасканалай сыстэмы грамадзянскай салідарнасьці".

Заява Рады грамадзянскіх ініцыятываў
”Свабодная Беларусь”

Сёньня Еўропа падыйшла да свайго новага рубяжа – поўнага вызваленьня ад таталітарных ды аўтарытарных рэжымаў. Новая хваля дэмакратычных рэвалюцый ў Сэрбіі, Грузіі і Украіне засьведчыла нежаданьне народаў гэтых краін жыць ва ўмовах несвабоды.

Сёньняшні беларускі рэжым стварыў адзін з самых жорсткіх апаратаў падаўленьня грамадзянскіх свабод постсавецкага пэрыяду. Беларусь стала краінай, дзе захоўваецца апошняя дыктатура Еўропы.

Відавочна, што дзеючая ўлада не дазволіць правесьці ў Беларусі дэмакратычныя, справядлівыя й празрыстыя выбары, а, адпаведна, любая выбарчая кампанія можа стаць толькі штуршком да палітычных трансфармацый і эканамічных рэформ.

Мы, прадстаўнікі грамадзянскай супольнасьці Беларусі, заяўляем:

Беларусь падыйшла да такога моманту, калі дэмакратычным сілам неабходна выпрацаваць новую дзейсную стратэгію, якая дазволіць кардынальна змяніць сітуацыю ў краіне.

Беларуская дэмакратычная апазыцыя мусіць правесьці рэструктурызацыю сваіх сіл. Палітычным партыям, што ўваходзяць у Еўрапейскую Кааліцыю і Народную Кааліцыю “5+”, неабходна выпрацаваць механізмы аб’яднаньня і вылучэньня палітычных лідэраў дэмакратычных сіл, якія здольныя рэальна змагацца за палітычную ўладу і правесьці эканамічныя рэформы ў краіне.

Суб’екты грамадзянскай супольнасьці мусяць засяродзіць свае высілкі на распрацоўцы эфектыўнай стратэгіі грамадзянскіх дзеяньняў, грамадзкім кантролі забесьпячэньня правоў ды свабод грамадзянаў, стварэньні дасканалай сыстэмы грамадзянскай салідарнасьці.

Мы зьвяртаемся да суайчыньнікаў:

Усе мы – грамадзяне Беларусі, і кожны з нас хоча жыць у еўрапейскай свабоднай, бясьпечнай, стабільнай і квітнеючай краіне.

Кожны з нас адказны перад сваімі дзецьмі й унукамі за тое, што адбываецца ў нашай краіне і за яе будучыню.

Кожны з нас можа дапамагчы Беларусі вярнуцца на шлях дэмакратыі, прыклаўшы да гэтага свае сілы і здольнасьці.

Будзем разам, і Беларусь стане вольнай!

Ад імя грамадзянскай ініцыятывы “Мы памятаем”
Ірына Красоўская і Сьвятлана Завадзкая

Ад імя грамадзянскай ініцыятывы “Свабоду палітзьняволеным!”
Ігар Марыніч і Павал Марыніч

Ад імя Агульнарэспубліканскага Страйкаму прадпрымальнікаў
Уладзімер Леванеўскі

Ад імя грамадзянскай ініцыятывы “Антыфашысцкае дзеяньне”
Юры Хашчавацкі

Ад імя грамадзянскай ініцыятывы “TERRA-Канвэнцыя”
Валер Дранчук

Ад імя моладзевай грамадзянскай ініцыятывы ”Волат”
Зьміцер Бародка

Ад імя грамадзянскай ініцыятывы Хартыя’97
Андрэй Саньнікаў і Зьміцер Бандарэнка

Ад імя грамадзянскай ініцыятывы “Ветэраны за дэмакратыю”
Валер Шчукін

Заява Рады і вынікі яе паседжаньня камэнтуе Андрэй Саньнікаў, які падпісаў дакумэнт ад імя грамадзянскай ініцыятывы Хартыя`97:

«Прайшоў пэрыяд выбараў і рэфэрэндумаў, лепш сталі бачныя як моцныя, гэтак і слабыя бакі дэмакратычных сілаў Беларусі. Стала відавочна, што без сур’ёзнай рэструктурызацыі дэмакратычнай супольнасьці на якія-небудзь посьпехі наўрад ці можна разлічваць. На нашу думку, сёньня неабходна правесьці размежаваньне паміж палітычнымі партыямі і грамадзянскай супольнасьцю. Менавіта таму мы абмеркавалі гэты падыход у рамках Еўрапейскай кааліцыі і заявілі, што мы не прэтэндуем на ўдзел у палітычным спэктры, не зьбіраемся ствараць сваю партыю альбо ўдзельнічаць у якіх бы то ні было выбарах у якасьці кандыдатаў. Можа быць з-за недакладнага разуменьня ролі грамадзянскай супольнасьці з нашага боку і з боку палітычных партый узьнікалі пэўныя канфлікты падчас палітычных кампаній у Беларусі.

Сёньня партыі, што ўваходзяць у Еўрапейскую кааліцыю, пачалі весьці вельмі неабходны працэс перамоваў з “Пяцёркай плюс”, які, несумненна, мусіць быць працягнуты і мусіць прывесьці да рэальнага аб’яднаньня дэмакратычных палітычных партый. Мы ж з свайго боку будзем займацца, па вялікім рахунку, тым, чым і займаліся раней. Перш за ўсё, гэта абарона правоў і свабод грамадзянаў Беларусі, умацаваньне салідарнасьці ўнутры грамадзянскай супольнасьці, асьветніцкая дзейнасьць. Я думаю, што такі распадзел абавязкаў паміж суб’ектамі дэмакратычнай супольнасьці Беларусі мусіць даць свае вынікі”.