Валерыя Фралова шукае міліцыя :: Хартыя'97 :: Навiны

Лідара групы “Рэспубліка”, патэнцыйнага кандыдата ў дэпутаты “парлямэнта” ад Гродна, генерала Валерыя Фралова, які зараз знаходзіцца ў Менску, шукае гарадзенская міліцыя. У панядзелак генерал неафіцыйна быў выкліканы ў Ленінскі РАУС Гродна. Калі Валерый Фралоў адмовіўся наведаць міліцыю з-за недахопу часу, на пошукі генерала былі высланы супрацоўнікі міліцыі. Учора ўвечары невядомыя супрацоўнікі міліцыі прыходзілі да дому генерала і цікавіліся, дзе знаходзіцца дэмакратычны дзеяч.

– Мне ў панядзелак патэлефанаваў намеснік начальніка Ленінскага РАУС г.Гродна і запрасіў на размову да начальніка гэтага РАУС. Я сказаў, што заняты і прыду на размову, як з’явіцца час. Я буду ў Гродне ў пятніцу – тады і падыду да іх, даведаюся, што яны хочуць ад мяне. Ім прыйдзецца знайсці міліцэйскага генерала, калі яны хочуць “паразмаўляць” са мной, – паведаміў ПАГОНІ Валерый Фралоў.

Павелічэнне цікаўнасці да генерала Фралова з боку гарадзенскай міліцыі можна звязваць з запланаванай на заўтра акцыяй пратэсту гарадзенскіх прадпрымальнікаў. Генерал з’яўляецца адным з падпісантаў улёткі, што была распаўсюджана ў апошні тыдзень па Гродне і ў якой лідэры дэмакратычнага руху “Гарадзенскі выбар” заклікаюць прадпрымальнікаў 10-га лютага распачаць безтэрміновую забастоўку і прыйсці на мітынг.
Минск, Белоруссия