Чаго чакаць ад візыту ўпаўнаважанага АБСЭ па пытаньнях мэдыяў ў Беларусь? :: Хартыя'97 :: Навiны

9 лютага ў Беларусь мае намер прыбыць упаўнаважаны АБСЭ па пытаньнях СМІ Міклаш Харасты. Візыт працягнецца тры дні – ад серады да пятніцы – і ў часе яго спадар Харасты мае намер атрымаць зь першых рук уяўленьне пра сытуацыю са свабодай прэсы ў Беларусі. Паводле інфармацыі АБСЭ, размова ў тым ліку пойдзе і пра спробу Эўропы дапамагчы Беларусі ў стварэньні свабоднага і адкрытага мэдыйнага ляндшафту ў адпаведнасьці з крытэрамі Арганізацыі бясьпекі і супрацоўніцтва ў Эўропе. Калі гэты візыт адбудзецца, дык ён стане першым прыездам у Беларусь упаўнаважанага АБСЭ па пытаньнях мэдыяў. Усе ранейшыя спробы спадара Харасты і ягонага папярэдніка Фраймута Дувэ наведаць Беларусь заканчваліся безвынікова.

Летась у верасьні спадар Харасты хацеў на ўласныя вочы паглядзець, як працуюць беларускія мэдыі непасрэдна перад парлямэнцкімі выбарамі. Але высокаму чыноўніку АБСЭ беларускія ўлады адмовілі ва ўязной візе. Ну а перад гэтым была выкарыстаная тая ж тактыка, што і з Дувэ. Спачатку беларускія ўлады папрасілі Харасты перанесьці візыт, каб сумясьціць яго з мэдыйным сэмінарам, потым зьмянілі структуру сэмінара, а ў рэшце рэшт адмянілі сэмінар.

У рамках візыту спадар Харасты будзе мець размовы зь міністрам замежных справаў Сяргеем Мартынавым, міністрам інфармацыі Ўладзімерам Русакевічам, міністрам сувязі Ўладзімерам Ганчарэнкам і старшынёй парлямэнцкай камісіі па правах чалавека, этыкі і СМІ Юрыем Кулакоўскім. Таксама заплянаваная сустрэча з журналістамі і прадстаўнікамі беларускіх недзяржаўных СМІ.

Што ж чакаюць у Менску ад першага прыезду сюды такой высокай асобы? Бадай, галоўнай стане размова пра спробу Эўропы дапамагчы Беларусі ў стварэньні свабоднага і адкрытага мэдыйнага ляндшафту ў адпаведнасьці з крытэрамі Арганізацыі бясьпекі і супрацоўніцтва ў Эўропе. Жаданьне, безумоўна, добрае, але, падобна, выканаць яго будзе вельмі цяжка, а можа і наогул немагчыма. Прынамсі, так думае шэф-рэдактар газэты “Народная воля” Сьвятлана Калінкіна:

“Я думаю, што цяпер беларускія ўлады будуць рабіць выгляд, быццам яны адкрытыя, што яны ідуць на перамовы. І там самым яны спрабуюць выключыць абвінавачваньне ў тым, што яны нават размаўляць не хочуць ні зь якімі міжнароднымі назіральнікамі. Але станоўчых вынікаў ад гэтых перамоваў я не чакаю. Таму што, нягледзячы ні на што, улады падрыхтавалі праект зьменаў у закон аб сродках масавай інфармацыі. Ён вельмі і вельмі жорсткі. І, напэўна, перад яго прыняцьцем улады вырашылі пусьціць дакладачыка АБСЭ ў Беларусь і нешта яму сказаць. Я ня думаю, што нехта будзе апраўдвацца ці нават слухаць прэтэнзіі, якія прад’яўляюцца да Беларусі і да таго стану, у якім у нас знаходзяцца СМІ”, -- паведаміла журналіст “Радыё Свабода”.
Минск, Белоруссия