Прадпрымальнікі рыхтуюцца да страйку :: Хартыя'97 :: Навiны

Нічым скончыліся ўчора шматгадзінныя перамовы прадпрымальнікаў і прадстаўнікоў Міністэрства эканомікі на чале з намеснікам міністра эканомікі Андрэем Турам, асноўнай тэмай якіх было абмеркаванне праблемы з ПДВ. Аргументы прадпрымальнікаў не знайшлі водгуку ў прадстаўнікоў ураду.

Размовы пачаліся пасля 15-ай гадзіны і працягнуліся да самага вечара. Нягледзячы на зацятасць дыскусіі, бакі цвёрда засталіся на сваіх пазіцыях і не прыйшлі да паразумення. Паводле Андрэя Тура, ліст з прапановай магчымых шляхоў урэгулявання ўжо накіраваны Аляксандру Лукашэнку, сам жа ўрад не мае паўнамоцтваў, каб адмяніць ПДВ. Прадпрымальнікі ўспрынялі такую пазіцыю Міністэрства, як нежаданне весці дыялог.

– Прадпрымальнікі разглядалі гэта як перамовы, а ўлады проста як яшчэ адзін спосаб выпусціць пар з сістэмы. У гэтым кантэксце падаецца дзіўным пункт гледжання некаторых прадпрымальнікаў, нібыта Лукашэнка не ведае пра рэальнае становішча з падаткам ПДВ. Калі чалавек асабіста кантралюе нават прызначэнне начальніка Камароўскага рынка, дык ён проста не можа не ведаць, якая сістэма падаткаў працуе ў краіне, – каментуе ПАГОНІ вынікі ўчарашніх перамоваў удзельнік дэлегацыі прадпрымальнікаў, эканаміст Яраслаў Раманчук. – Учора прадпрымальнікі ўбачылі, як да іх ставяцца. Улада фактычна сказала, што ёй абыякавы лёс непасрэдна 70-ці тысяч людзей, і 700 тысяч людзей ускосна. Пакуль урад канкрэтна не скажа пра адмену падатку, прадпрымальнікі будуць выступаць супраць, будуць баставаць. Нас чакае гарачая вясна.

Згодна заявам лідэраў прадпрымальнікаў, калі сітуацыя з падаткам ПДВ не вырашыцца да 1 сакавіка, прадпрымальнікі пачнуць бестэрміновую рэспубліканскую масавую акцыю пратэсту.