Следства па справе аб паклёпе на Лукашэнку працягнутае на месяц :: Хартыя'97 :: Навiны

23 лютага следчы па асабліва важных справах Менскай гарадской пракуратуры Аляксей Пікараў на месяц працягнуў тэрмін следства па крымінальнай справе аб абвінавачванні намесніка старшыні Беларускага Хельсінскага камітэта Гары Паганяйлы ў паклёпе на Аляксандра Лукашэнку.

Прычынай гэтага, паводле слоў следчага, стала тое, што Гары Паганяйла, «загрузіў следства вельмі сур`ёзнымі дакументамі і матэрыяламі, над якімі варта папацець». І самае галоўнае: на імя генпракурора накіравана хадайніцтва пра спыненне крымінальнай справы за адсутнасцю складу злачынства. Хадайніцтва перададзена следству, каб вырашыць усе праблемы, узнятыя ў ім у часе следчых дзеянняў.

У сярэдзіне жніўня 2004 года Гары Паганяйла даў тэлеінтэрв`ю шведскім журналістам.

– Я расклаў па паліцах усю інфармацыю пра знікненні палітычных апанентаў на Беларусі, пра тых, хто мае дачыненне да гэтых знікненняў, – паведаміў ПАГОНІ Паганяйла.

Тэлежурналіста затрымалі пры перасячэнні беларускай дзяржаўнай мяжы, відэакасету забралі супрацоўнікі КГБ, якія, вывучыўшы відэазапіс, прыйшлі да высновы, што ёсць усе падставы для ўзбуджэння крымінальнай справы. Крымінальную справу па абвінавачванні ў паклёпе на Лукашэнку вядзе пракуратура Менску.
Минск, Белоруссия