У Гродна затрыманы журналіст Андрэй Пачобут :: Хартыя'97 :: Навiны

Каля 17.00 стала вядома, што гродзенская міліцыя затрымала журналіста інфармацыйнага Інтэрнэт-сайту pahonia.promedia.by Андрэя Пачобута. Ён сам патэлефанаваў калегам і паведаміў, што знаходзіцца ў Ленінскім РАУС Гродна, дзе на яго складзены пратакол аб адміністратыўным правапарушэнні.

Як распавёў ГА “Беларуская асацыяцыя журналістаў” калега затрыманага Анджэй Пісальнік, 3-га сакавіка перад пачаткам акцыі гродзенскіх прадпрымальнікаў да Андрэя Пачобута на вуліцы падышоў начальнік Ленінскага РАУС палкоўнік міліцыі Сычэўскі. Ён папрасіў журналіста зайсці ў аддзяленне міліцыі, каб даць дадатковыя паказанні па транспартным здарэнні з аўтамабілем Сяргея Скрабца. (А. Пачобут быў сведкам гэтага інцыдэнту). Сычэўскі матываваў сваю просьбу тым, што ў справе “ўзніклі новыя абставіны”. А. Пачобут сказаў, што зойдзе, калі скончыцца акцыя, о ён мусіць асвятляць яе.

Пасля акцыі А. Пачобут зайшоў у рэдакцыю, дзе падрыхтаваў паведамленне на сайту, пасля чаго рушыў у міліцыю. Праз паўтары гадзіны ён патэлефанаваў адтуль і паведаміў, што на яго склалі пратакол за ўдзел у несанкцыянаванай вулічнай акцыі.

“Сычэўскі цудоўна ведаў, што А. Пачобут – журналіст і выконваў свае прафесійныя абавязкі, асвятляючы хаду акцыі”, - упэўнены А. Пісальнік.

“Гэта помста журналісту з боку гарадскіх уладаў за актыўнае асвятленне прадпрымальніцкіх пратэстаў, - лічыць галоўны рэдактар сайту pahonia.promedia.by і газеты “День” Мікола Маркевіч.