Камітэт ПАРЭ заклікаў неадкладна вызваліць Марыніча :: Хартыя'97 :: Навiны

У чацьвер на паседжаньні ў Парыжы была ўхваленая дэклярацыя камітэту ў юрыдычных справах і правах чалавека ПАРЭ наконт прысуду Міхаілу Марынічу. Аб гэтым паведаміў «Радыё Свабода» дэпутат Парлямэнцкай асамблеі Рады Эўропы (ПАРЭ) Хрыстас Пургурыдэс. У заяве гаворыцца, што камітэт ПАРЭ “адзначае з глыбокай занепакоенасьцю нядаўні судовы працэс і пазбаўленьне волі Міхаіла Марыніча”.

Дакумэнт нагадвае, што спадар Марыніч ёсьць апазыцыйным палітыкам, якога асудзілі за крадзеж кампутараў з амбасады ЗША ў Беларусі, хаця амэрыканскі дзярждэпартамэнт даў ясна зразумець, што ня мае да яго ніякіх прэтэнзіяў.

Таксама адзначаецца, што вырак спадару Марынічу быў зьменшаны пасьля заяваў старшынёўства Эўрапейскай Рады, дзяржаўнага дэпартамэнту ЗША ды арганізацыі “Amnesty International”, якая абвясьціла яго вязьнем сумленьня.

Паводле парыскай дэклярацыі, камітэт ПАРЭ разглядае гэтую інфармацыю ў кантэксьце сваёй трывалай цікавасьці да Беларусі, у тым ліку ў зьвязку з высновамі справаздачы ПАРЭ наконт зьніклых асобаў у Беларусі. Камітэт таксама згадаў справаздачу аб перасьледзе прэсы ў Беларусі ды высновы Вэнэцыянскае камісіі пра незаконнасьць рэфэрэндуму аб падаўжэньні тэрміну паўнамоцтваў прэзыдэнта: “На думку камітэту, судовыя працэдуры супраць спадара Марыніча ёсьць новым сьведчаньнем адсутнасьці судовай незалежнасьці ў Беларусі, што адлюстроўвае агульную адсутнасьць шанаваньня вяршэнства закону ды ўсеагульную атмасфэру палітычных рэпрэсіяў”.

Камітэт ПАРЭ заклікаў беларускія ўлады неадкладна вызваліць Міхаіла Марыніча.

mmmmm Белоруссия