Беларусь не запрасілі у Кіеў на канфэрэнцыю Рады Эўропы па СМІ :: Хартыя'97 :: Навiны

10 сакавіка прэзыдэнт Украіны Віктар Юшчанка адкрыў у Кіеве сёмую міністэрскую канфэрэнцыю Рады Эўропы, прысьвечаную палітыцы мэдыяў. Спадар Юшчанка нагадаў, што ягоная дзяржава – гэта краіна, “дзе дзясяткі журналістаў паклалі сваё жыцьця за тое, каб пісаць праўду”, і сярод іх быў Георгі Гангадзэ, забойцаў якога знайшлі нядаўна.

“Мы ачысьцім Украіну ад бруднай ганьбы!” – сказаў Віктар Юшчанка, адкрываючы кіеўскую канфэрэнцыю Рады Эўропы. Выступ украінскага прэзыдэнта слухалі міністры інфармацыі й культуры ўсіх краін Эўропы – апрача Беларусі.

“Мы не накіроўвалі запрашэньне ў Беларусь – менавіта таму, што Беларусь у гэты момант не адпавядае стандартам, якія патрэбныя для ўдзелу ў дзейнасьці Рады Эўропы. Мы вельмі заклапочаныя, што Беларусь застаецца, так бы мовіць, адзінай чорнай дзіркай на эўрапейскім ляндшафце, і што народ Беларусі адчувае ізаляванасьць ад рэшты Эўропы з прычыны адсутнасьці добрай волі ўладаў зрабіць правільны сыгнал у напрамку да Рады Эўропы. Што да свабоды й павагі да фундамэнтальных правоў і свабодаў, чаго патрабуюць Статут Рады Эўропы ды Эўрапейская канвэнцыя правоў чалавека, дык мы мяркуем, што Беларусі трэба прайсьці яшчэ доўгі шлях, і з гэтай прычыны яна ня ёсьць часткай нашай сям’і”, -- паведаміў “Радыё Свабода” галоўны арганізатар форуму намесьніца генэральнага сакратара Рады Эўропы Мод дэ Б’ёр-Букік’ё.
Минск, Белоруссия