Прадпрымальнікі патрабуюць спыніць перасьлед актывістаў прадпрымальніцкага руху :: Хартыя'97 :: Навiны

Беларускія прадпрымальнікі, якія бяруць удзел у агульнанацыянальным страйку, лічаць крымінальную справу лідэра грамадзкага аб’яднаньня “Пэрспэктыва” Анатоля Шумчанкі сфальшаванай і патрабуюць ягонага неадкладнага вызваленьня. Нагадаем, удзельнікі акцыі пратэсту, распачатай 1 сакавіка, дамагаюцца адмены падатку на дабаўленую вартасьць.

Абвінавачаньне старшыні “Пэрспэктывы” ў крымінальным злачынстве было разгледжана актывістамі гэтага грамадзкага аб’яднаньня. Як паведаміў «Радыё Свабода» намесьнік старшыні “Пэрспэктывы” Аляксандар Лапотка, паплечнікі лідэра прадпрымальнікаў лічаць здарэньне з Шумчанкам правакацыяй.

Сплянаванай акцыяй з палітычным падтэкстам лічыць абвінавачаньне старшыні “Пэрспэктывы” лідэр лепельскіх прадпрымальнікаў Алег Тычына:

“Маё меркаваньне, што Шумчанку трымаюць не таму, што ён зьбіў сукамерніка. Гэта сыгнал тым лідэрам, якія паспрабуюць вывесьці сваіх людзей 25 сакавіка а 15-й гадзіне на Кастрычніцкую плошчу. І ў першую чаргу гэта тычыцца Андрэя Клімава”.

12 сакавіка ў Барысаве адбыўся шматсоценны агульнагарадзкі сход прадпрымальнікаў, якія былі паінфармаваныя пра сытуацыю з Анатолем Шумчанкам. Вось што паведаміў на гэты конт лідэр мясцовай суполкі “Пэрспэктывы” Віктар Гарбачоў:

“Людзі ў шоку, і пасьля таго, што адбылося, сказалі, што нам нельга пакідаць у бядзе сваіх лідэраў. Трэба працягваць змагацца. Людзі яшчэ раз пераканаліся, што дзяржава і ўлады хлусяць. Вядуць падпольнае, тайнае змаганьне па развале ўсіх арганізацыяў і па зьнішчэньні лідэраў”.

Паводле Гарбачова, барысаўскія прадпрымальнікі зьвярнуліся да прадстаўнікоў праваахоўных органаў з патрабаваньнем спыніць перасьлед актывістаў прадпрымальніцкага руху, прадстаўнікоў дэмакратычных арганізацыяў. Сход бізнэсоўцаў гэтага горада таксама прыняў рашэньне пра працяг страйку, які доўжыцца ўжо 12 дзён.

Белоруссия