Перасьлед актывістаў апазыцыі ўзмацняецца :: Хартыя'97 :: Навiны

Лідэра сацыял-дэмакратаў Міколу Статкевіча выклікаюць у Цэнтральны РУУС Менску. Яму патлумачылі, што гэтым разам справа тычыцца падзеяў 1 сакавіка. Тады каля 3 000 прадпрымальнікаў сабраліся на Кастрычніцкай плошчы на знак пратэсту супраць увядзеньня новага ПВД. За акцыю прадпрымальнікаў прыцягнулі да адказнасьці старшыню аб’яднаньня “Перспектыва” Анатоля Шумчанку і старшыню Мінскай гарадзкой арганізацыі Аб’яднанай грамадзянскай партыі Марыну Багдановіч.

Чаму сёньня, 7 красавіка, калі прайшло больш за месяц пасьля тых падзеяў, выклікаюць Міколу Статкевіча? Паводле неафіцыйных крыніцаў, па факту падзеяў 1 сакавіка – а гэта ня толькі несанкцыянаваны мітынг, але й несанкцыянаванае шэсьце да адміністрацыі Аляксандра Лукашэнкі, якое спынілі і разагналі амонаўцы – распачатая крымінальная справа. Апроч Міколы Статкевіча, у міліцыю будуць выклікаць усіх выступоўцаў на мітынгу.

Сам лідэр сацыял-дэмакратаў не выключае, што на яго складуць адміністрацыйны пратакол за арганізацыю апазыцыйнай акцыі і адвязуць у суд. Калі гэта спраўдзіцца, то сёньня адным палітвязьнем у спэцпрыёмніку стане болей. Мікола Статкевіч лічыць, што паколькі апошнія месяцы былі насычаныя вулічнымі выступленьнямі, улады спрабуюць такім чынам спыніць гэтую хвалю.

Некалькі чалавек трымаюць за кратамі спэцпрыёмніка за ўдзел у апазыцыйнай акцыі 25 сакавіка. Учора амонаўцы разагналі жывы ланцуг, які ладзілі некалькі дзесяткаў чалавек, дзеля ўшанаваньня памяці Генадзя Карпенкі.

Сытуацыя ў судах нагадвае канвэер. 7 красавіка ў Кастрычніцкім судзе будуць судзіць актывіста Аб’яднанай грамадзянскай партыі Аляксандра Бяспалага за распаўсюд улётак, дзе была інфармацыя пра тое, што адбудзецца ланцуг памяці Генадзя Карпенкі, адзначае “Радыё Свабода”.
Минск, Белоруссия