Першыя ахвяры галадоўкі :: Хартыя'97 :: Навiны

На дзесяты дзень галадоўкі, адзін з непаўнагадовых удзельнікаў акцыі ў Жодзіна - Карэнюхін Павал, страціў прытомнасьць.

Пасьля інцэдэнту адразу была выкліканая хуткая дапамога. Лекары, каторыя прыбылі на месца галадоўкі, зрабілі некалькі ўколаў Паўлу і прапанавалі гаспіталізаваць яго, настойваючы на спыненьні галадоўкі, але Павал адмовіўся і вырашыў працягваць акцыю. Але, па рашэньню аргкамітэту правядзеньня галадоўкі, які ўзначальвае Павал Красоўскі, удзел у акцыі Паўлу Карэнюхіну быў забаронены. Таксама было прынята рашэньне пра спыненьне галадоўкі непаўнагадовага Сяржука Мурашкі.

Удзел у акцыі спыніў і кіраўнік МФ у Баранавічах - Сяржук Марчык, у якога абвострылася асма, пры якой лекары увогуле забараняюць праводзіць галадоўку. Яшчэ раней удзел у акцыі спыніў прадстаўнік “Зубру” з Барысаву Міхась Кандрашоў .

Такім чынам у акцыі ўдзельнічае дзесяць чалавек - кіраўнік «Маладой Грамады» ў Жодзіна Зьміцер Чарткоў, актывіст дэмакратычнага руху Вінаградаў Алесь, сустаршыня «Маладога Фронту» Зьміцер Дашкевіч, намесьнік сустаршыні МФ Валера Мацкевіч, актывісты МФ Артур Фінькевіч, Кірыл Шымановіч, Ваўкавец Яўген, Ігар Шчэкарэвіч і непаўнагадовыя Настасься Палажанка і Антаніна Вежнявец .

3 чэрвеня праходзіла паседжаньне адміністратыўнай камісіі жодзінскага гарвыканкаму, якая згадзілася з рашэньнем кіраўніцтва Жодзінскага палітэхнікуму аб адлічэньні Сяржука Мурашкі. Такім чынам жодзінскія ўлады заблякавалі адно з самых галоўных патрабаваньняў галадоўшчыкаў.

Наступным крокам Сяржук Мурашкі і ягоныя бацькі зьбіраюцца падаваць заявы ў суд на гэтыя рашэньні. Таксама разглядам гэтае справы яшчэ займаецца пракуратура.
Минск, Белоруссия