БСДГ можа быць ліквідаваная :: Хартыя'97 :: Навiны

У сувязі з выкананьнем загаду Міністэрства юстыцыі аб пераводзе суполак партыяў і грамадзкіх аб’яднаньняў з жылога ў нежылы фонд пацярпелі арганізацыйныя структуры ўсіх апазыцыйных партыяў. Найбольшая ж пагроза паўстала перад Беларускай сацыял-дэмакратычнай Грамадой – яна можа быць ліквідаваная.

З 90 структураў БСДГ толькі дзьве разьмяшчаліся ў нежылых памяшканьнях, нават цэнтральны орган партыі быў зарэгістраваны ў кватэры. Выканаць патрабаваньне Мінюста БСДГ ня можа з матэрыяльных прычынаў – штомесяц за арэнду памяшканьняў для 90 офісаў трэба было б плаціць 8 тысячаў эўра,– зазначае лідэр БСДГ Станіслаў Шушкевіч.

“Можам цяпер у Менску зьняць офіс, але дзяржава не здае на ільготных умовах, а прыватнікам дадзеная каманда, што ня дай Бог вы здасьцё таньней, тады вы паплоціцеся. І яны кажуць, што іх закон не абавязвае здаваць плошчы партыям на льготных умовах”, -- паведаміў “Радыё Свабода” лідар партыі.

Шушкевіч аспрэчыў апошнія рашэньні Мінюста ў лісьце міністру Галаванаву, назваўшы ягоную трактоўку патрабаваньняў нелягічнай, неазконнай і несправядлівай. Шушкевіч кажа, што ягоная партыя вымушаная будзе існаваць так, як існуе Партыя працы, закрытая раней у адпаведнасьці з рашэньнем Вярхоўнага суду.

Як паведамілі ў Мінюсьце, усе партыйныя і грамадзкія структуры, зарэгіставаныя ў жылым фондзе, зьнятыя з уліку.
Минск, Белоруссия