Адвакат Скрабца просіць зьмяніць меру стрыманьня :: Хартыя'97 :: Навiны

Адвакат актывіста беларускай апазіцыі, былога дэпутата і лідара групы “Рэспубліка” Сяргея Скрабца просіць зьмяніць свайму падабароннаму меру стрыманьня. Аб гэтым адвакат Міхаіл Хоміч паведаміў “Радыё Свабода” 8 чэрвеня. Паводле ягоных словаў, выхад з галадоўкі ў камэры сьледчага ізалятару пагражае сур`ёзнымі нэгатыўнымі наступствамі для здароўя экс-дэпутата.

Адвакат нагадаў, што 7 чэрвеня, ён меў сур`ёзную размову з былым парлямэнтаром, падчас якой папярэдзіў яго аб усіх нэгатыўных мэдычных наступствах працяглага галадаваньня. Калі не прытрымлівацца мэдычных правілаў, дык могуць адкрыцца язвы страўніка, пачнуць хварэць ныркі, можна й інфаркт атрымаць. Пра гэта ж Сяргею Скрабцу кажуць і лекары, якія апошнім часам наведваюць яго штодзень раніцай.

Родныя экс-дэпутата спадзяюцца, што ён хутка прыпыніць галадоўку. Яго жонка Аляксандра Скрабец атрымала ліст з-за кратаў, у якім Сяргей просіць прыслаць яму сокі з гародніны, дзеля таго, каб, як ён піша, пачаць выхад з галадоўкі. Але калі дакладна ён хоча зрабіць гэты крок, галадоўнік не паведамляе.

Сяргей Скрабец, які быў арыштаваны яшчэ 15 траўня, ад таго дня абвясьціў галадоўку на знак пратэсту супраць абвінавачваньняў, якія ён лічыць беспадстаўнымі. Экс-дэпутата абвінавачваюць паводле двух артыкулаў Крымінальнага кодэксу — падрыхтоўка да злачынства і хабарніцтва.

Адвакат спадзяецца, што праваахоўныя органы могуць разгледзець ягонае хадайніцтва аб зьмене Сяргею Скрабцу меры стрыманьня – напрыклад, пад падпіску аб нявыезьдзе альбо хатні арышт 9 альбо 10 чэрвеня.

Мэдыкі сьцьвярджаюць, што, для таго, каб выйсьці нармальна з галадоўкі, патрэбна ня менш за сем дзён, пачынаючы са зьмяненьня умоваў утрыманьня.
Минск, Белоруссия