На Берасьцейшчыне працягваецца перасьлед праваабаронцаў :: Хартыя'97 :: Навiны

Дэпутат Маларытскага райсавета і сябра праваабарончага цэнтру “Вясна” Уладзімір Малей атрымаў уведамленне адзьдзелу дазнаньня УУС Брэсцкага аблвыканкама аб аднаўленні спыненага папярэдняга расьследаваньня па крымінальнай справе па ч.2 арт.188 КК Рэспублікі Беларусь за распаўсюджваньне ў № 13 інфармацыйнага бюлетэня “Наша слова” “загадзя ілжывых, саромячых вымыслаў аб дзеяньнях старшыні Маларытскага райвыканкама Лапіча”.

Дадзеная крымінальная справа была ўзбуджана 2 лютага 2005 года пракурорам Маларытскага раёна, 14 красавіка была прынятая да вытворчасці старэйшым дазнацелем упраўленьня дазнаньня ПР УУС Брэсцкага аблвыканкама капітанам міліцыі Масюком і спыненая 2 траўня ў сувязі з адсутнасьцю ў дзеяньнях Малея складу злачынства.

Але 3 чэрвеня “падозраны” Малей атрымаў уведамленье аб тым, што 31 траўня папярэдняе расьследваньне крымінальнай справы адноўлена ў сувязі з адменай пастановы першым намеснікам пракурора Брэсцкай вобласці.

Валянцін Стэфановіч, юрыст праваабарончага цэнтру “Вясна” каментуе гэтае уведамленьне наступным чынам: “Мясцовая вертыкаль працягвае аказваць ціск на мясцовых дэпутатаў і грамадзкіх актывістаў, якія актыўна змагаюцца за правы простых грамадзянаў і адкрыта выступаюць супраць карупцыі. Нават у тых выпадках, дзе абвінавачваньні відавочна абсурдныя і неабгрунтаваныя.”
Минск, Белоруссия