Рашэнне па зысках супраць «Народнай волі» будзе абвешчана 9 чэрвеня :: Хартыя'97 :: Навiны

8 чэрвеня суд Ленінскага раёна Мінска разглядаў зыскі чатырох супрацоўнікаў салігорскага прадпрыемства "Беларуськалій" да рэдакцыі "Народнай волі". Зыскоўцы патрабуюць, каб газета зняпраўдзіла інфармацыю пра тое, што яны падпісаліся пад зваротам аб стварэнні руху "Воля народу", і кампенсавала маральныя страты кожнага сумаю ў 50 млн. рублёў. Рашэнне будзе абвешчана 9 чэрвеня. Дарэчы, у той жа час у тым жа судзе пачнуць разглядацца яшчэ чатыры аналагічныя зыскі жыхароў Клецку, якія патрабуюць з рэдакцыі па 5 мільёнаў рублёў кампенсацыі.

Слуханні па зысках Сяргея Катовіча, Паўла Жышкевіча, Ніны Грэчыц і Ніны Фраловай пачаліся ў судзе 8 чэрвеня. Пад час судовага паседжання высветлілася, што сп. Жышкевіч паставіў свой подпіс пад калектыўным лістом у падтрымку руху "Воля народа", але назваўся чужым прозвішчам. З чатырох зыскоўцаў тэкст апублікаванага газетай звароту чытала толькі спн. Фралова, але ўсе яны лічаць, што подпіс пад ім абражае іх гонар і годнасць.

Прадстаўнікі рэдакцыі "Народная воля" агучылі ў судзе свае пярэчанні па зыску. На думку адказнікаў, інфармацыя пра тое, што зыскоўцы падпісалі лісты ў падтрымку стварэння руху, не з`яўляюцца ганебнымі ("порочащими"). "У дэмакратычнай прававой дзяржаве, якой з`яўляецца Рэспубіка Беларусь, згодна з арт. 1 Асноўнага закона, звесткі пра тое, што нейкая асоба падтрымлівае стварэнне падобнага руху, не можа прынізіць гонар і годнасць… з пункту гледжання выканання законаў, нормаў маралі…незалежна ад адпаведнасці альбо неадпаведнасці рэчаіснасці гэтай інфармацыі, а таксама палітычных поглядаў гэтай асобы. Рэакцыю зыскоўцаў на публікацыю можна было б патлумачыць толькі ў таталітарнай дзяржаве, у той час як арт. 4 Канстытуцыі РБ замацоўвае прынцып разнастайнасці палітычных інстытутаў, ідэалогій і меркаванняў", - лічаць прадстаўнікі "Народнай волі".
Минск, Белоруссия