Слова «Сталін» вярнулася на фасад Сувораўскай вучэльні :: Хартыя'97 :: Навiны

Фасад сувораўскай вучэльні першапачаткова быў аздоблены выявамі кніжак з надпісамі “Маркс”, “Энгельс”, “Ленін”, “Сталін”. Пасьля разьвянчаньня “культу асобы” імя Сталіна было сьцёртае. Рашэньне пра вяртаньне першапачатковага выгляду прынялі разам з агульнай рэстаўрацыяй будынку. Зараз слова “Сталін” на фасадзе Сувораўскай вучэльні паўтараецца больш за дзесяць разоў – па колькасьці дэкаратыўных “кніжачак”. Рэканструкцыю сувораўскай вучэльні ладзіць Менгарвыканкам.

Паводле гісторыка Захара Шыбекі, будынак сучаснай Сувораўскай вучэльні ўзьнік у першай палове ХІХ ст. Ад 1840 году там месьцілася духоўная сэмінарыя. Ад прыходу бальшавікоў і да сёньня ў будынку знаходзіліся рознага кшталту камуністычныя вайсковыя навучальныя ўстановы. Сучасны выгляд будынак набыў на пачатку 1950-х гадоў.

На колькі апраўданае вяртаньне імя Сталіна з пункту гледжаньня аднаўленьня гістарычнай спадчыны?

“Калі сьледваць такой лёгіцы, чаму б тады нямецкаму народу не пачаць аднаўляць аўтэнтыку пэрыяду гітлераўскіх 1933-1945 гг. Калі ставіць акцэнты, што тут аднаўляць, я за тое, каб аднавіць комплекс духоўнай вучэльні ХІХ стагодзьдзя”, -- камэнтуе сытуацыю нядаўні дзяржаўны інспэктар па ахове гісторыка-культурнай спадчыны Менгнарвыканкаму Ўладзімер Папруга. Нядаўна інспэктар гарвыканкаму Ўладзімер Папруга застаўся бяз працы, бо яму не працягнулі кантракт.

Цяпер у Беларусі ёсьць бюст Сталіна, які стаіць у пасёлку Сьвіслач на Гарадзеншчыне. Таксама ў Слуцку, дзе рабочыя аднаго з будаўнічых упраўленьняў раскапалі бюст Сталіна, і ўсталявалі ў двары свайго прадпрыемства. А 30 чэрвеня пад Заслаўем для турыстаў адчыніцца гісторыка-культурны комплекс пад назвай “Лінія Сталіна”.
Минск, Белоруссия