Справа па зыску да «Народнай волі» скончылася міравым пагадненнем :: Хартыя'97 :: Навiны

Судовыя слуханні па зыску аб абароне дзелавой рэпутацыі вытворчага аб`яднання "Беларуськалій" да рэдакцыі газеты "Народная воля" ў гаспадарчым судзе г. Мінска 29 чэрвеня скончыліся міравым пагадненнем. Пра гэта паведаміла ГА "Беларуская асацыяцыя журналістаў" адвакат "Народнай волі" Ларыса Атаманчук.

Зыск "Беларуськалія" тычыўся публікацыі ў №77 ад 23 красавіка 2005 г. артыкула "Такая воля народа", дзе ішла гаворка пра стварэнне грамадскага руху "Воля народа" і сцвярджалася, што подпісы ў яго падтрымку паставілі шэраг супрацоўнікаў прадпрыемства. Зыскоўцы патрабавалі прызнаць распаўсюджаныя звесткі не адпаведнымі рэчаіснасці і ганебнымі для дзелавой рэпутацыі прадпрыемства. У першы дзень слуханняў, 23 чэрвеня, суд абавязаў бакі прадаставіць некаторыя дадатковыя дакументы.

29 чэрвеня перад пачаткам паседжання прадстаўнікі прадпрыемства "Беларуськалій" прапанавалі заключыць міравое пагадненне. У адпаведнасці ім, зыскоўца адмаўляецца ад сваіх прэтэнзій і бярэ на сябе аплату судовых выдаткаў, а "Народная воля" павінна да 15 ліпеня апублікаваць абвяржэнне апублікаваных звестак і прынесці прабачэнні за іх распаўсюд.

Нагадаем, што 17 чэрвеня той жа суд спыніў вытворчасць па аналагічнай справе аб абароне дзелавой рэпутацыі Салігорскага дзяржаўнага горна-тэхнічнага тэхнікума з прычыны таго, што гэтая спрэчка "не падлягае разгляду ў гаспадарчым судзе". 9 чэрвеня суд Ленінскага раёна г. Мінска часткова задаволіў тры з чатырох зыскаў супрацоўнікаў ВА "Беларуськалій" да рэдакцыі "Народнай волі", абавязаўшы газету выплаціць кожнаму з іх па 2 мільёны рублёў.
Белоруссия