«Палатка» едзе на сэсію ПА АБСЭ :: Хартыя'97 :: Навiны

Сёньня ў Вашынгтоне распачынае працу 14-я штогадовая сэсія Парлямэнцкай асамблеі АБСЭ. Яе тэма - "30 гадоў пасьля Гэльсынкі: новыя выклікі". Сёлета спаўняецца 30 гадоў ад часу падпісаньня гістарычнага Гэльсынскага Заключнага акту і 15 гадоў ад прыняцьця Парыскай Хартыі. Зьбіраецца ў Амэрыку і афіцыйная дэлегацыя нелегітымнага “нацыянальнага сходу” Беларусі пад кіраўніцтвам віцэ-сьпікера “палаты прадстаўнікоў” Сяргея Забалотца.

У “нацыянальным сходзе” пакуль не адкрываюць для грамадзкасьці пэрсанальны склад афіцыйнай дэлегацыі. Прычыны такой засакрэчанасьці таксама афіцыйна не тлумачацца. У сувязі з адмысловым палажэньнем аб парадку накіраваньня ў службовыя камандзіроўкі за мяжу, якое нядаўна падпісаў кіраўнік краіны, узгадненьне гэтага пытаньня зацягваецца - магчыма, у “палаце” чакаюць дазволу з прэзыдэнцкай адміністрацыі.

Як было вядома раней, беларуская праблематыка ў парадку дня штогадовай сэсіі ня значыцца. Не плянуецца ў Вашынгтоне і паседжаньне спэцыяльнай рабочай групы па Беларусі Парлямэнцкай асамблеі АБСЭ, якой кіруе Ута Цапф.

Прадстаўнікі беларускай апазыцыі ў працы вашынгтонскай сэсіі ўдзельнічаць не зьбіраюцца. Адмысловай дэлегацыі апазыцыя не накіроўвала ў Вашынгтон у сувязі з тым, што беларуская праблематыка на сэсіі закранацца ня будзе. Аднак цяпер у рабочай паездцы ў Канадзе і ЗША знаходзіцца сябра палітрады Аб’яднанай грамадзянскай партыі Валянціна Палевікова, і яна пры неабходнасьці можа далучыцца да парлямэнцкай дыскусіі.

“Для нас ехаць на сэсію, дзе няма ў парадку дня беларускага пытаньня, бессэнсоўна, гэта называецца “палітычны турызм”. Але я думаю, няма сэнсу і ехаць Забалотцу, Канаплёву і ўсім астатнім, таму што ў любым выпадку, у кулюарах, на камітэтах будзе згадвацца Беларусь ня ў самым лепшым сэнсе. Гэта значыць, проста чырванець і не прад’явіць ніякіх аргумэнтаў, што сытуацыя ў Беларусі паляпшаецца. Беларускаму боку няма чаго сказаць”, -- ацэньвае ацэньвае шанцы афіцыйнай дэлегацыі ў Вашынгтоне ў інтэрв’ю “Радыё Свабода” старшыня АГП Анатоль Лябедзька.
Белоруссия