Беларускае пытаньне будзе сёньня абмяркоўвацца ў Страсбуры :: Хартыя'97 :: Навiны

Сёньня ў Страсбуры, дзе 4-га ліпеня адкрылася чарговая сэсія Эўрапарлямэнту, будуць разглядаць сытуацыю ў Беларусі. Пра гэта «Радыё Свабода» паведаміў кіраўнік дэлегацыі Эўрапарлямэнту ў сувязях зь Беларусьсю Богдан Кліх. Паводле яго, галоўным пры абмеркаваньні будзе сытуацыя са свабодай мэдыяў у краіне й шляхі атрыманьня жыхарамі Беларусі праўдзівай інфармацыі.

Учора позна ўвечары з Страсбуру прыйшла інфармацыя пра тое, што дэбаты па Беларусі на сэсіі пачнуцца а 23-й гадзіне. Гэта зьвязана з тым, што перад дэпутатамі зьбіраецца выступіць камісар Эўразьвязу ў зьнешніх сувязях былы міністар замежных справаў Аўстрыі спадарыня Беніта Фэрэра-Вальднэр. І, дарэчы, беларускую рэзалюцыю цяпер ужо зьбіраюцца прымаць не ў чацьвер, а ў сераду.

Доўгі час лідэрам ў беларускіх справах была Парлямэнцкая асамблея АБСЭ. Потым да беларускіх справаў далучылася Парлямэнцкая асамблея Рады Эўропы. Менавіта яна прыпыніла сяброўства Беларусі ў гэтай міжнароднай арганізацыі пасьля правядзеньня так званага рэфэрэндуму ў лістападзе 1996 году. Апошнія год-два становішчам у Беларусі сур’ёзна зацікавіўся і Эўрапарлямэнт.

"Эўрапейскі парлямэнт зьяўляецца найбольш прагрэсіўным органам у адносінах зь Беларусьсю. Там існуе спэцыяльная група ў сувязях зь Беларусьсю, якая прыняла вельмі добрую рэзалюцыю адносна сытуацыі ў нашай краіне. Яна зьяўляецца лякаматывам сярод усіх эўрапейскіх структураў і актыўна ставіць беларускае пытаньне ў Эўрапарлямэнце ды Эўразьвязе", -- гаворыць з гэтай нагоды намесьнік старшыні Аб`яднанай грамадзянскай партыі Яраслаў Раманчук, які курыруе ў АГП міжнародныя пытаньні.
Минск, Белоруссия