Узброены напад на дом менскага лiдэра Партыi БНФ :: Хартыя'97 :: Навiны

У ноч з суботы на нядзелю каля паўтара дзясятку людзей у міліцэйскай форме й у цывільным уварваліся ў прыватны дом старшыні Менскай гарадзкой арганізацыі Партыі БНФ Уладзімера Кішкурны, які месьціцца ў раёне вуліцы Арлоўскай. Каб патрапіць у дом, яны выбілі дзьверы й выламалі акно.

Гаспадар і гаспадыня знаходзіліся ў ад`езьдзе, дома быў толькі іхны 22-гадовы сын Антон. Ніякага ордэру на ператрус агрэсары не аказалі, заявіўшы толькі, што робяць "агляд". Нягледзячы на гэта, яны ўзламалі ўсе ўнутраныя замкі, у тым ліку гаспадарчых пабудоваў, перагледзелі ўсе паперы Ўладзімера Кішкурны. Антон Кішкурна затрыманы, нібыта на падставе абвінавачаньня ў перахоўваньні боезапасаў (быццам бы некалькіх старых патронаў), і знаходзіцца ў Цэнтральным РУУС. Ператрус у адсутнасьць гаспадара працягваецца. Кіраўніка Праваабарончага цэнтру "Вясна" Алеся Бяляцкага ў дом не пусьцілі. Дом пільнуюць аўтаматнікі.

Старшыня Партыі БНФ Вінцук Вячорка, які падчас нападу знаходзіўся ў Берасьці, так ахарактарызаваў дзеяньні ўладаў:

"Гэта пераход клікі ў новую якасьць. Дасюль улада рабіла выгляд, што шануе прыватную ўласнасьць. Цяпер дзяржаўным тэрарыстам дазволена ўсё: бяз ордэру злачынна ўрывацца ў дамы, захопліваць закладнікаў зь ліку блізкіх родзічаў, без гаспадара рабіць у доме якія заўгодна правакацыі. Таму мы яшчэ пачуем байкі пра збройныя арсэналы ды наркотыкі, хаця ўладам добра вядома, што змагаемся мы зь імі словам праўды й нічым іншым. Мы ўпэўненыя, што ў абарону Ўладзімера Кішкурны, аднаго з найбольш ахвярных, адважных і сумленных фронтаўцаў, без ваганьняў выступіць ня толькі Партыя БНФ, але ўся дэмакратычная грамадзкасьць нашае краіны й сьвету".
Белоруссия