Уладзімер Кішкурна лічыць затрыманьне сына правакацыяй :: Хартыя'97 :: Навiны

Супрацоўнікі Цэнтральнай раённай управы міліцыі Менску правялі ператрус у прыватным доме старшыні гарадзкой арганізацыі Партыі БНФ Уладзімера Кішкурны. У выніку быў затрыманы сын гаспадара Антон, якога падазраюць у датычнасьці да незаконнага абароту наркотыкаў і захаваньня боезапасаў. Таксама арыштаванае друкарскае абсталяваньне, на якім, нібыта, друкаваліся апазыцыйныя ўлёткі. Уладзімер Кішкурна лічыць гэтую міліцэйскую акцыю правакацыяй, скіраванай супраць яго і ягонай сям’і.

Больш за дзесяць міліцыянтаў прыехалі да прыватнага дому Ўладзімера Кішкурны позна ўвечары 9 ліпеня. Гаспадара і гаспадыні дома не было. Іх 22-гадовы сын Антон адчыняць дзьверы пабаяўся, таму яны былі зламаныя. Выбілі таксама і некалькі шыбаў. Міліцыянты адразу ж пачалі ў доме ператрус. Хаця, як потым заявілі міліцэйскія начальнікі праваабаронцам, гэта быў не ператрус, а акцыя ў рамках апэратыўна-вышуковых мерапрыемстваў.

У сына Ўладзімера Кішкурны знайшлі паляўнічы патрон, а таксама два набоі да пісталета Макарава і адзін да снайпэрскай вінтоўкі СВД. У гаспадарчай прыбудове да дому міліцыянты знайшлі друкарскую машыну. Антон Кішкурна быў затрыманы і зьмешчаны ў ізалятар часовага ўтрыманьня, а хлеў, дзе стаіць друкарка, цяпер пільнуюць два міліцыянты.

У сьледчай частцы Цэнтральнага райаддзелу міліцыі адмовіліся паведамляць, у чым канкрэтна абвінавачваецца Антон Кішкурна і і які будзе далейшы лёс друкарскага абсталяваньня.

Адвакат Антона Аляксандар Галіеў паведаміў, што пакуль супраць затрыманага распачатая справа па факце незаконнага абароту наркотыкаў. 12 ліпеня яму прад’явяць афіцыйнае абвінавачаньне, і, на думку адваката, магчыма, таксама будзе заведзеная справа па факце захаваньня боезапасаў. Яму пагражае да пяці гадоў пазбаўленьня волі.

“Гэта тры патроны, якія ён назьбіраў за ўсё сваё жыцьцё. І ён пра іх проста забыўся. Адзін патрон ён знайшоў у паляўнічым доміку, а другі ў свайго дзядзькі. Трымаў іх, выкінуць хацеў, а Антон убычыў і — дай мне, дай мне. Прывёз, кінуў, і ўсе забыліся”, – паведаміла “Радыё Свабода” жонка Ўладзімера Кішкурны Валянціна:

Паводле адваката Аляксандра Галіева, сам Антон сказаў міліцыянтам, што зьбіраўся здаць патроны міліцыі ў рамках апэрацыі “Арсэнал”. Сваю датычнасьць да распаўсюду наркотыкаў ён адмаўляе.

Тым часам 10 ліпеня па тэлеканалах БТ і ОНТ быў паказаны сюжэт пра ператрус у доме Кішкурны. У ім сьцьвярджалася, што апазыцыя ня толькі друкуе антыдзяржаўныя ўлёткі, але і захоўвае зброю ды наркотыкі. А вось што сказаў “Радыё Свабода” з нагоды ператрусу і затрыманьня сына сам Уладзімер Кішкурна:

“Яны скарыстоўваюць момант, каб нас запалохаць. Каб мы не займаліся ніякімі справамі, і ачарніць нас у вачах людзей. Я такімі справамі, як крыміналам, не займаюся”.

Уладзімер Кішкурна гаворыць, што ніякіх улётак і газэтаў ён у сябе дома не друкаваў, а абсталяваньне пакінуў яму на захаваньне адзін знаёмы. Спадар Кішкурна, а таксама праваабаронцы гавораць, што ператрус быў незаконны, бо адбываўся бяз санкцыі пракурора. Валянціна Кішкурна сёньня напісала заяву пракурору з просьбай вызваліць сына пад падпіску пра нявыезд.
Белоруссия