Вацлаў Гавел запрасіў беларускага апазіцыянера на Форум-2000 :: Хартыя'97 :: Навiны

Ліст з запрашэннем да ўдзелу ў Міжнароднай канферэнцыі Форум-2000 у Празе Аляксандру Мілінкевічу даслаў экс-прэзідэнт Чэхіі, знакаміты драматург Вацлаў Гавел. “Мы маем намер сабраць у Празе паважаных людзей свету – Нобелеўскіх лаўрэатаў і палітыкаў, каторыя дапамагаюць дасягнуць мірнага вырашэння канфліктаў і войнаў, выбітных дзеячоў дэмакратыі, акадэмікаў і аналітыкаў, пісьменнікаў і інтэлектуалаў -- каб вызначыць, ацаніць і даследаваць ключавыя выклікі, якія паўсталі перад чалавецтвам у новым тысячагоддзі”, - піша Вацлаў Гавал ў лісце.

Канферэнцыя Форум-2000 пройдзе 9 і 10 кастрычніка сёлета ўжо дзевяты раз. Заснаванае гэтае мерапрыемства было ў 1997 годзе Вацлавам Гавелам, лаўрэатам Нобелеўскай прэміі Эді Візель, і японскім філантропам Йохі Сасакава. Удзельнікамі Форума-2000 за дзевяць гадоў яго правядзення з’яўляліся Біл Клінтан, Шымон Перэс, Генры Кісінджэр, Далай-Лама, Мадлен Олбрайт. Першыя выніковыя дакументы Форума-2000 пад назвай “Пражская Дэкларацыя”, былі прынятыя як афіцыйныя рашэнні ААН.

У гэтым годзе тэма Форума-2000 пазначаная так: “Выклікі і спадзявнні для цывілізацыі ў ХХI-м стагоддзі”. У рамках мерапрыемства будзе арганізаваная серыя дэбатаў, мэта якіх - знайсці адказы на найбольш вострыя пытанні сённяшняга дня, такія як: прырода і значэнне сучасных канфліктаў між рэлігійным экстрэмізмам і этнічнай неталеранцыяй з аднаго боку - і міжнароднай супольнасцю з другога.

З галоўнай прамовай на цырымоніі адкрыцця Форума-2000 выступіць Вацлаў Гавел. Цырымонія пройдзе ў саборы Святой Ганны, які нядаўна быў адрэстаўраваны пры ўдзеле сям’і Гавелаў, паведамляе ГроднаNews.
Белоруссия