Адкрыты лiст да афiцэраў, генералаў, курсантаў, вайскоўцаў запасу, да саюза афiцэраў Беларусi :: Хартыя'97 :: Навiны

Цi маглi бы Вы ўдарыць Святлану Завадзкую ў твар? З гэтым пытаннем я звяртаюся да ўсiх, хто адносiць сябе да мужчынскага полу. У чорную для ўзброеных людзей Беларусi пятнiцу 8 лiпеня тэлеэкраны свету паказалi, як на цэнтральным пляцы Мiнска нейкае, прабачце за рэзкi выраз, боўдзiла ў вайсковым мундзiры ўдарыла кулаком дрэсiраванага забойцы ў твар маладую жанчыну! Другi такi ж у форме пхнуў пацярпелую ў плечы наўздагон.

Мы былi сведкамi таго, як адбывалася злачынства, i зазначым — патрэбы ў сiле не было: жанчына не пагражала спакою на вулiцах i жыццю грамадзян, не несла небяспеку людзям. Да таго ж сiлавiкоў, або так званых ахоўнiкаў парадку, толькi ў мундзiрах на пляцы было вялiкае мноства.

Што ж адбылося?

Здалi нервы ахоўнiкаў ладу?

З`явiлiся заахвочваючыя да злачынстваў iнструкцыi “забеспячэння стабiльнасцi”?

Яна ўдарыла?!

Дык чаму яго навучалi? Дзе яго вывучка, дзе рэакцыя прафесiянала, калi ён не здолеў локцем закрыцца ад кволай жаночай рукi з партрэтам мужа, якога яна i ўсе сумленныя грамадзяне шукаюць як ахвяру злачынцаў?

Як афiцэр, я магу сцвярджаць: гэтыя прафесiйныя недавучкi арыентаваны не на абарону парадку, а на знявечанне, на навядзенне страху!

Дзе ў iнтэлектуальна развiтай Беларусi ўдалося адшукаць недавумкаў, здатных быць замбiраванымi на знявечанне i забойствы мiрных грамадзян? Хто дазволiў iм насiць пагоны?

Колькi вас, у пагонах, моўчкi сцерпяць ганьбу вайсковай славы?

Колькi з вас, у пагонах, будуць ушаноўваць тых, хто стаў звяр`ём, ператварае ў кардэбалет ганаровую варту, творыць ганьбы, за якiя ў цывiлiзаванай краiне iмгненна выгналi б з вайсковага асяроддзя?

I лагiчна, што Iрына Халiп не ў стане была стрымацца, каб не даць па мордзе боўдзiлу з пракурорскiмi паўнамоцтвамi, а Юля Чыгiр — з`ездзіць па хамскай храпе ахоўнiка ў пагонах. А што да Святланы Завадскай, дык у напаўшага на яе гора-ваякi не хапiла мужнасцi на большае, чым прыкусiць губу i прыкiнуцца пацярпелым!

Савецкiя афiцэры i генералы, беларускiя грамадзяне i вайскоўцы! Адмяжуйцеся ад “абаронцаў парадку” ў пагонах, якiя не здольны абаранiць свае ўласныя пысы ад зняважаных iх хамствам жанчын. Адмяжуйцеся ад салiдарных з iмi недавумкаў! Станьце на абарону Закону!

Я — як доктар навук, прафесар, заслужаны дзеяч навукi i тэхнiкi, член-карэспандэнт Нацыянальнай Акадэмii навук, лаўрэат мiжнароднай, дзяржаўнай i Савета мiнiстраў СССР прэмiй, удзельнiк савецкiх стратэгiчных навуковых праграм, ганаровы доктар шэрагу замежных унiверсiтэтаў, народны дэпутат СССР, БССР i Беларусi, першы кiраўнiк незалежнай Беларусi i ў рэшце рэшт як афiцэр запасу — палкоўнiк — нагадваю вам, што ў сучасным свеце нiводнае злачынства вайскоўцаў не мiне Трыбуналу. Успомнiце, дзе сёння самыя шустрыя лiзуны Мiлошавiча i Саддама. Дзе сёння “славянскi герой Караджыч”? Дзе абяцаны Славянскi Саюз ад Балкан да Аляскi? Дзе ўкраiнскiя губернатары, якiя пагражалi падзялiць Украiну з дапамогай славянафашыстаў з Расii? З упэўненасцю магу сказаць, што i “героi 8 лiпеня” будуць пакараны — i вельмi хутка.

Успомнiце, што ледзь не ўчора тагачасны ўкраiнскi прэзiдэнт i прэм`ер падрыхтавалi загад “зачысцiць Кiеў” i раздалi патроны 70 тысячам вайскоўцаў. Украiнскiя генералы, афiцэры i шарагоўцы пацвердзiлi свой гонар — не пайшлi на злачынства.

Час “нераскрытых гадамi забойстваў” мiнае. Сусветная супольнасць вырашыла скончыць са злачынствамi пад прыкрыццём дзяржаўных органаў. Ад адказнасцi за злачынствы са зброяй у руках не ўцячэ цяпер нiхто i ў Беларусi.

Як вучоны, я ведаю жудасныя праявы i прыроду замбiравання. Але я ведаю i веру ў сiлу i непераможную моц сям`i, гуманiзму, цывiлiзацыi, дэмакратычных прынцыпаў.

Сапраўдныя мужчыны выбiраюць Гонар, Бацькаўшчыну, Свабоду!

Жыве Беларусь!

Станiслаў ШУШКЕВIЧ,

старшыня Цэнтральнай Рады партыi “Беларуская сацыял-дэмакратычная Грамада”.
Минск, Белоруссия