Старшыня рады БНР не прыехала ў Менск з палітычных матываў :: Хартыя'97 :: Навiны

16-17 ліпеня ў Менску ў памяшканьні Міжнароднага адукацыйнага цэнтру (IBB), які знаходзіцца ў мікрараёне Паўднёвы Захад, праходзіў IV зьезд згуртаваньня беларусаў сьвету “Бацькаўшчына”. Частка дэлегатаў і гасьцей зьезду з розных прычынаў не прыехала ў Менск. Многіх прадстаўнікоў дыяспары непакояць унутрыпалітычная сытуацыя ў Беларусі, праблемы перасячэньня дзяржаўнае мяжы ды іншыя, зьвязаныя з гэтым прычыны.

“Заходнія дэлегаты, асабліва з Аўстраліі, выказалі непакой наконт сваёй бясьпекі, што могуць быць некаторыя рэпрэсіі, таму яны і не прыедуць. Некаторыя выказваюць незадаволенасьць тым, што ёсьць такія фінансава-мытныя пытаньні на мяжы, якія таксама іх непакояць. Не прыедзе і старшыня рады БНР Івонка Сурвілла — з палітычных матываў”, -- паведаміў “Радыё Свабода” напапярэдні з’езду кіраўнік згуртаваньня беларусаў сьвету “Бацькаўшчына” прафэсар Анатоль Грыцкевіч.

Аднак бальшыня дэлегатаў, а гэта 189 асобаў з 23 замежных краінаў, пацьвердзілі свой намер узяць удзел у працы зьезду. Прыехалі чальцы “Бацькаўшчыны” з Польшчы, Украіны, Літвы, Аўстрыі, іншых эўрапейскіх краінаў, а таксама даволі прадстаўнічая група са Злучаных Штатаў Амэрыкі. Дарэчы, у аднаго зь іх, доктара гісторыі Янкі Запрудніка, узьніклі праблемы з рэгістрацыяй тут, як таго патрабуе цяперашняе беларускае заканадаўства. Патраціўшы цэлы тыдзень на спробы зарэгістравацца, спадар Запруднік нарэшце патрапіў у адпаведны кабінэт, але там у яго забралі пашпарт на чатыры дні. А знаходжаньне замежных грамадзянаў бяз пашпарту на тэрыторыі Беларусі забараняецца.

Што ж да месца правядзеньня зьезду, то, як вядома, без тлумачэньня прычынаў адміністрацыі ўсіх буйных заляў у цэнтры сталіцы адмовілі “Бацькаўшчыне”, і яго праводзілі ў Міжнародным адукацыйным цэнтры (IBB).
Минск, Белоруссия