Рыгора Барадуліна вылучаюць на атрыманьне Нобелеўскай прэміі :: Хартыя'97 :: Навiны

Шэраг духоўных асобаў, пісьменьнікаў, мастацтвазнаўцаў абвясьцілі пра намер вылучыць на атрыманьне Нобэлеўскай прэміі ў галіне літаратуры кнігу паэзіі Рыгора Барадуліна “Ксты”. У гісторыі Беларусі раней быў адзін падобны досьвед: на самую прэстыжную міжнародную прэмію быў вылучаны Васіль Быкаў.

Пра сур’ёзнасьць намераў ініцыятараў сьведчыць стварэньне адмысловага камітэту ў вылучэньні кнігі паэзіі “Ксты” на Нобэлеўскую прэмію. Кіраўніком камітэту абраны паэт Уладзімер Някляеў, сакратаром – кандыдат філялягічных навук, укладальніца і рэдактарка кнігі “Ксты” Ала Сакалоўская.

Ала Сакалоўская паведаміла, што думка пра гэта ўзьнікла адразу ж пасьля прэзэнтацыі кнігі ў Чырвоным касьцёле 23 чэрвеня. І сярод найбольш актыўных прыхільнікаў такой ідэі быў ксёндз Уладзіслаў Завальнюк.

У зборнік “Ксты” увайшлі новыя і ранейшыя вершы Барадуліна духоўнага, філязофскага зьместу. Сабраныя разам, яны ўтвараюць паэтычныя цыклі, кожны зь якіх чытаецца як асобная невялічкая паэма.
Минск, Белоруссия