Сяргею Скрабцу працягнулі тэрмін стрыманьня пад вартай :: Хартыя'97 :: Навiны

Былому дэпутату і лідару групы “Рэспубліка” Сяргею Скрабцу працягнулі тэрмін стрыманьня пад вартай да 27 жніўня. Пра гэта “Радыё Свабода” паведаміў 25 ліпеня брат былога дэпутата — Аляксандар Скрабец. Ён спасылаецца на словы экс-парлямэнтара, якому прадстаўнікі сьледзтва паведамілі, што, “калі ён будзе на волі, дык можа паўплываць на іншых удзельнікаў сьледчага працэсу”.

Паводле Аляксандра Скрабца, ягоны брат па-ранейшаму знаходзіцца ў Берасьцейскім сьледчым ізалятары.

Летам 2004 году Сяргей Скрабец удзельнічаў у галадоўцы дэпутатаў, якія патрабавалі дэмакратызацыі выбарчага заканадаўства. Летась у кастрычніку ён зьвярнуўся да прэзыдэнта Расеі з просьбай пра палітычны прытулак, аднак атрымаў адмоўны адказ. Сёлета ў красавіку Беларускае тэлебачаньне паказала сюжэт, у якім сьцьвярджалася, што спэцслужбы затрымалі кур’ера, які вёз зь Вільні 200 тысяч даляраў — нібыта для фінансаваньня палітычнай дзейнасьці Сяргея Скрабца.
Минск, Белоруссия