Польшча узгадніла пазыцыі адносна Беларусі :: Хартыя'97 :: Навiны

Больш як тры гадзіны доўжылася сустрэча прэм’ер-міністра Польшчы Марка Бэлькі з прадстаўнікамі палітычных партыяў, міністэрстваў і ўстановаў, якія займаюцца міжнароднай праблематыкай. Падчас яе палітыкі пагадзіліся адносна неабходнасьці стварэньня новага радыё для Беларусі.

Мэтай сустрэчы была дыскусія на тэму праблемаў у польска-беларускіх і польска-расейскіх дачыненьнях. Як паведаміў пасьля сустрэчы Інфармацыйны цэнтар польскага ўраду, падчас размоваў падкрэсьлівалася, маўляў, і Беларусь і Расея зьяўляюцца для Польшчы вельмі важнымі партнэрамі.

Невядома, пра што дакладна дыскутавалі і да якіх высноваў дайшлі палітыкі. Адзінай інфармацыяй, якой удзельнікі сустрэчы ахвотна дзеляцца з прэсай, зьяўляецца задаволенасьць фактам, што сустрэча адбылася. Праўда, ёсьць галасы, што правесьці яе трэба было два месяцы раней. Людвік Дорн з партыі “Права й Справядлівасьць” сказаў інфармацыйнаму агенцтву PAP, маўляў удзельнікі сустрэчы пагадзіліся адносна патрэбы стварэньня радыёстанцыі, якая б вяшчала ў бок Беларусі.

“Выказваючыся на тэму польска-расейскіх зносінаў прэм’ер Бэлька зазначыў, што каб пераадолець напружаньне паміж нашымі краінамі, трэба на ўзроўні Эўрапейскага Зьвязу прэзэнтаваць канструктыўныя погляды й прапановы”, – паведамляецца ва ўрадавым камунікаце.