Рух «Зубр»: Арышт грамадзян Грузіі выкліканы панічным страхам дыктатарскага рэжыму :: Хартыя'97 :: Навiны

24 жніўня 2005 году ў цэнтры беларускай сталіцы сіламі крымінальнай міліцыі былі затрыманыя грамадзяне Грузіі - актывісты моладзевага руху “КМАРА” і журналісты Гіоргі Кандэлакі і Лука Цуладзэ, а таксама адзін з каардынатараў “Зубру” Уладзімер Кобец. Пасьля некалькіх гадзінаў знаходжаньня ў Маскоўскім РУУС каардынатар “Зубру” быў вызвалены, а грамадзянаў Грузіі дагэтуль трымаюць пад вартай. Ноч з 23 на 24 жніўня Гіоргі і Лука правялі ў сумнавядомым сьпецпрыёмніку-разьмеркавальніку ГУУС Менгарвыканкаму на вуліцы Акрэсьціна. Па ўсёй верагоднасьці ўлады рыхтуюць дэпартацыю грузінаў зь Беларусі.

Абодва грамадзяніна Грузіі, якія прыбылі ў Беларусь як прыватныя асобы, знаходзіліся ў нашай краіне легальна і мелі неабходную для замежных грамадзянаў рэгістрацыю. Гіоргі Кандэлакі і Лука Цуладзэ праводзілі адкрытыя сустрэчы з прадстаўнікамі беларускіх грамадзкіх аб’яднаньняў, дзеячамі культуры і мастацтва.

Мы ніколі не хавалі, што паміж “Зубрам” і “Кмарай” існавалі і існуюць партнэрскія ўзаемадачыненьні, а нашая дзейнасьць накіравана на разьвіцьцё супрацоўніцтва беларускага і грузінскага грамадзтваў, няўрадавых грамадзкіх арганізацый і асобных грамадзянаў.

Гвалт над грамадзянамі Грузіі выкліканы панічным страхам апошняга дыктатарскага рэжыму ў Еўропе перад магчымымі дэмакратычнымі пераўтварэньнямі ў Беларусі, падобнымі да тых, што адбыліся ў Грузіі і ва Украіне.

Рух “Зубр” заяўляе пратэст дзеяньням беларускіх уладаў, накіраваным супраць традыцыйна сяброўскіх стасункаў паміж беларусамі і грузінамі. Мы пратэстуем супраць выкарыстаньня крымінальнай міліцыі Беларусі ў палітычных мэтах.

“Зубр” патрабуе ад уладаў неадкладна вызваліць Гіоргія Кандэлакі і Луку Цуладзэ, спыніць нематываваны перасьлед іншых замежных грамадзянаў у Беларусі, адмовіцца ад палітыкі, якая дыктуецца паранаідальным страхам вышэйшага кіраўніцтва Беларусі страціць уладу.

Рэжыму ня ўдасца ізаляваць беларускае грамадзтва ад зьнешняга сьвету. У той час, калі іншыя еўрапейскія краіны рухаюцца да больш шчыльнай інтэграцыі сваіх грамадзтваў, робяць межы максімальна празрыстымі для сваіх грамадзянаў, дзеяньні, накіраваныя на ізаляцыю 10 мільёнаў еўрапейцаў - грамадзянаў Беларусі - ад пачатку асуджаныя на правал.

БЕЛАРУСКІ РУХ СУПРАЦІВУ «ЗУБР»